An sawrkar loh hnua sawrkar ten leiba an chhawm ve loh nan hma an la dawn tih Chief Minister in a sawi

Chief Minister Lalduhoma’n ZPM sawrkarin kum 2 an sawrkar chhungin sawrkar hmasa ten leiba an neih, Committed Liability cheng nuai 6,311 an pektlâk tawh thu sawiin, ZPM sawrkar chuan an sawrkar loh hnua sawrkar tur ten leiba an chhawm ve loh nan hma an lak dawn thu a sawi bawk.

ZPM Party chuan nimin khan kum 2026 atana Party Chhung Inkhawm hmasa ber neiin he hunah hian Chief Minister Lalduhoma chuan sawrkar sum dinhmun siamthatna kawnga an hmalakna sawiin, “Kan hriat angin 2023 kumtawp-ah ni 7 chhungin theihtawpin tan kan la nghal, chuta tang chuan Vawiin thlengin kan Overdraft leh tawh lo a ni,” a ti a, “Committed Liability an tih hi leibat hlui kan tih, kum hnih chhunga kan tihfel hi cheng nuai 6311 a ni. La rulh hmabak hi nuai 7646 kan nei,” tiin sawrkar hmasa ten Committed Liability hmangin leiba cheng engemawzat an hnutchhiah thu a sawi a; Administrativa approval pawh awm lo, Expenditure sanction leh Work Order pawh awm loa tawngkaa hna inpek, Record a chuang lo a tam thu leh harsatna a tam phah hle tih a sawi a. “Kan tih nimiah lo min hnutchhiah ang hi keini chuan neih ve kan tum lo,” a ti.

Chief Minister chuan Sawrkarna an siam hnuah Committed Liability hnuaiah PWD Department leiba cheng nuai 1287 an pek tawh thu leh pek hmabak cheng nuai 583 ala awm thu sawiin, PHE Department-ah leiba cheng nuai 4,842 an rulh tawh thu leh rulh hmabak cheng nuai 5,801 ala awm thu leh heng rulh hmabak la awmte hi kum 3 chhunga rulh zawh an tum thu a sawi a. Heng bakah hian Power & Electricity Department leiba cheng nuai 182 an pek tawh laiin pek hmabak cheng nuai 1262 ala awm thu leh kum 2 chhunga rulh zawh an tum thu a sawi bawk.

Chief Minister chuan sawrkar department hrang hrang hmalakna te sawiin, Kawng siamna khawl pawimawh sawisak an tuar zeuh zeuh nia sawiin, “Kawngtha neih duhlo leh ZPM sawrkar hmingthatna daltute hi manchhuak in na takin kan hrem zel dawn,” a ti a. “Kan tum ber ‘Ram rorelna ah Pathian ram thlen tir’ a ni a, kan sawrkar hnu hian chutiang ang thlenna tur chu Pathian in min pe,” a ti bawk.