Kawng siamna bungrua tichhetu nia hriat man a ni

Aizawl-Thenzawl-Lunglei (ATL) Road siam meka kawng siamna hmanrua tichhetu nia hriat mi pakhat chu Lunglei Police ten manin thu zawhfiah chhunzawm mek a ni.

Hemi chungchangah hian Lunglei District Superintendent of Police (SP) J. Lalmuankima chuan thuchhuah siamin SLT Company te'n ATL (Aizawl-Thenzawl-Lunglei) Road an siam mekah Pukpui Lunglei dai-a kawng siamna khawl an dah te chu tun thla, January 4 leh 10 inkar khan mi tu tih hriat loh ten suasamin Tandem Roller leh Sensor Paver Machine Wlectric wiring te tan chhiaa an ruk bo bakah, Diesel litre 100 vel a bo tel bawk a ni.

He thil thleng chungchangah hian Mausen Camp-a inkulh SLT Company-a Site Engineer Subrata Patra chuan Lunglei Police Station-ah FIR (First Information Report) thehlutin, Lunglei PS-ah thubuai ziahluh a ni a, Lunglei Police ten theihtawp a hma la nghalin Police-te leh FSL (Forensic Science Laboratory) expert-te chuan thil thlenna hmuna evidence pawimawh turte an lakhawm nghal a. Nimin (Jan. 12, 2026) zing khan Lunglei Zotlang YMA leh Pukpui VDP te nena tangkawp chuan he pawi khawihtu ni ngeia hriat, T. Lalrinmawia (39), Pukpui, Lungleia khawsa nia inchhal chu an man a ni a, thu zawhfiah a nih hnuah pawikhawihna ah hian a inhnamhnawih ngei a ni tih Police hmaah a sawi a ni.

Aizawl-Thenzawl-Lunglei (ATL) Road siamtu SLT Company te chuan heng an khawl chhia siamthatna atan hian a tlem berah chawlhkar hnih (2) an mamawh tur thu PWD hnenah an sawi a, PWD hotute pawhin an Department Mini-Roller pahnih pawh suasam a nih thu sawiin, parts then-khat ruk a nih thu te pawh an sawi a. Hemi hmalam hian SLT Company ten Mausen dai-a Rora herna khawl an bun pawh thla hmasa, December 9 zan khan mi tu tih hriatloh ten a tluang hrui an lo tichhe tawh bawk a, hemi tum hian Police-ah FIR an thehlut lo thung nia thudawn a ni bawk.