Serchhip-ah Earthquake Mock Exercise nei

Chhiatrupna thlen thulha chhanchhuah leh chhawmdawlna hna kalpui dan tur a tak anga enchhinna 'State Level Mock Exercise on Earthquake' chu nimin khan Mizoram hmun hrang hrangah neih niin Serchhip-ah pawh Bawrhsap Paul L. Khuma kaihhruaina hnuaiah hlawhtling taka neih a ni.
National Disaster Management Authority (NDMA), Mizoram State Disaster Management Authority (MZSDMA) leh District Disaster Management Authority te tangkawp buatsaih Mock Excercise hi Serchhip-ah chuan hmun thum ah neih niin chawhma dar 10:00-ah Serchhip DC Pisa atanga Siren ti-ri in Lirnghing Magnitude 7.1-a na in leilung a sawi leh hemi avanga chhiatna chi hrang hrang thleng angin chhanchhuahna leh chhawmdawlna hna hi thawh a ni.

Tun tumah hian lirnghing in Serchhip Bazar Building leh Govt. Higher Secondary School Science Laboratory Building sawi chim anga lem chan niin heng chhiatna a thlen anga chan tan a nih hian Responsible Officer - Serchhip DC hnenah chhiatna thlen thu report pek a ni a. Bawrhsap hian Incident Commander atan Additional DC Lalrinzuala chu ruat nghalin Leisekawt Field-ah Staging Area leh Serchhip Indoor Stadium-ah Relief Camp siamin District Emergency Operation Centre-ah IRS te pungkhawmin chhan-chhuahna hna an thawk a. Quick Response Team (QRT) ten Building chim kar atanga thi leh hliam te hrui hmanga khaichhuakin hmun him lamah an dah a, Damdawi In lama mithiam en a tul ang ang an buaipui bawk a ni.

Hemi hnu hian Khawthim hnua chhiatna a thlena chet lak dan tur zir nan tlai dar 4:40-ah Serchhip P&E Veng-ah Mock Exercise hi neih chhunzawm leh a ni a, QRT, Aapda Mitra, Govt. Serchhip College Youth Adventure Club, Sub-Hqrs. YMA, Village Disaster Management Committee (VDMC), Assam Rifles, Serchhip Police, Serchhip District Hospital leh Department hrang hrang te an tel a ni.