Grassroot Cricket Tournament (Boys)-ah Govt. Midland School Serchhip an Champion

Zonuna Kawlni /

Mizoram-a Grassroot Cricket School te tana Cricket Tournament chu nimin khan 3rd Battalion MAP Ground, Mualpui-ah khelh zawh niin Mipa inelna ah Serchhip atanga tel Govt. Midland School te chu an Champion.
 Grassroot Cricket School atan hian Cricket Association of Mizoram (CAM) leh Samagra Shiksha Mizoram te chuan April 12, 2022 khan thawhhona thuthlung ziakin, Cricket zirna atana mamawh zawng zawngte CAM-in an tum vek a, zirlai leh School lama buaipui ngai awm apiang Samagra Shiksha ten an buaipui thung a. Cricket zirna atan hian Aizawl khawpui chhung Middle School 10 leh Aizawl pawn District pathum-ah School pakhat theuh thlan niin tun tuma Tournament-ah hian Aizawl khawpui chhunga School 10 atangin Boys leh Girls Team an tel a, Serchhip District atangin Govt. Midland School Serchhip Boys Team an tel bawk a ni.


Nimin khan he Tournament hi Final khelh niin Mipa inelna ah Serchhip atanga tel Govt. Midland Comprehensive School chuan Govt. Chhinga Veng Middle School chu hnehin an Champion a, Govt. Midland Comprehensive School player Mangliana chu Player of the Tournament-ah thlan niin Best Bowler atan Ngurthantluanga (Govt. Chhinga Veng Middle School) leh Best Batter-ah Rodinngheta (Govt Chhinga Veng Middle School) te chu thlan an ni bawk.

Hmeichhe inelna ah Govt. Nepali Middle School chuan Govt. Bethlehem Middle School hnehin an Champion bawk a, Best Bowler-ah Urmila Begum (Govt. Nepali Middle School Khatla) chu thlangin Best Batter-ah Lalnunmawii (Govt. Nepali Middle School) thlangin ani hi Player of the Tournament-ah thlan a ni bawk.

He Tournament kharna Inkhawm nimin-a neih hi School Education Minister Dr. Vanlalthlana chuan hmanpuiin Zirlaite chu tumruhna nen an hma lam khawvel hmachhawn tur te, harsatna karah pawh tlawm mai lova hlawhtlinna thawkchhuak thei turin a chah. India ram Cricket-a an lan chuan khawvel huapah an lang nghal tih sawiin, Cricket Association of Mizoram te nen kum 5 chhung thawhhona neih a nih chhungin thil tha tam tak an hmuh thu a sawi a. Zirlaite chu Cricket khelh bansan mai lova a bulthut thiamna nei tura chhunzawm zel tur leh zirna pangngai thlahthlam lova ngai pawimawh zel turin a chah bawk.

Serchhip AOC Veng-a Govt. Midland Comprehensive School-ah hian kum 2024 khan Grassroot Cricket School hi kalpui tan niin tunah hian Cricket khelh zir naupang 40 vel an awm mek a, District Co-ordinator Lalremruata hovin Lalrempuia chu School Co-Ordinator a ni a, R. Lalrinfela chu Coach niin Samuel Vanlalawmpuia chu Asst. Coach a ni bawk.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

Dialysis-ah Technician dah

Zonuna Kawlni /
Image
District Hospital, Serchhip-a Dialysis khawl bun tawh chu hman a nih theihna turin Technician dah a ni dawn nia thudawn a ni. District Hospital Serchhip-a Dialysis khawl hi bun fel tawh niin Nurse pahnih te chuan Training an nei zo tawh a, Technician dah la ni lo mah se Bialtu MLA leh Chief Minister Lalduhoma chuan MLA Fund atangin Technician hi a ruai dawn nia thudawn niin Vanlalrengpuii Kawlni, P&E Veng Serchhhip chuan nimin khan Joining Report a pe a ni. Ser-chhip-ah hian Dialysis khawl hi pahnih bun niin Serchhip-ah hian Dialysis tih ngai hi mi 40 vel an awm mek nia hriat a ni bawk.
Kimchang zawkin »