Sawrkar laipui in pe dawn

Aizawl-a Assam Rifles chhuahsan Building leh infrastructure man Mizoram sawrkar in a pek tur cheng vcb. 5.23 chu pe lo turin Sawrkar laipui in a ngaidam tih Chief Minister Lalduhoma chuan a tarlang.

Nizan hmasa khan hemi chungchang hi Chief Minister Lalduhoma chuan Social Media kaltlanga tarlangin, “Tunhnaiah khan Union Minister of State for Home Affairs Pu Nitiyanand Rai chuan nikum May thlaa ka D.O Letter zuk thawn tawh an bawhzuina D.O Letter hmang vekin a rawn chhang a. Aizawl khawpui chhung atanga Assam Rifles-te kalsan Buildings & Infrastructure, a hlutna (depreciated cost) chhut chhuah anga Mizoram sawrkarin kan pek ve tura tih tawh chu pek a ngaih loh tur thu min rawn hrilh,” a ti.

Assam Rifles te nena inremna (MoA) ziah ah khan building leh infrastructure an kalsante chu tuna an hlutna ang hu in kan pek ve tura tih a nih thu Chief Minister chuan tarlang bawkin, cheng vbc. 5.2304  man nia chhut a nih thu a sawi a, “Central sawrkar tan han ui tham niin a lang lova, keini ang State rethei tan a hautak tham lawi si a. Min ngaidam mai turin ka zu dil a. Kan dilna a hlawhtling ta hi a lawmawm khawp mai,” a ti bawk.