Politics khelh nana Sports hmang lo turin mipuite sawm

Sports & Youth Services Department Minister Lalnghinglova Hmar chuan Politics khelh nana Sports hmang lo turin mipui a sawm.

Tuipuiral Games & Sports Association (GSA) buatsaih Tuipuiral Annual Sports Meet vawi 53-na hawnna hun nizan hmasa a Champhai District chhunga awm Lianpui Community Hall-a neih ah Sports Minister Lalnghinglova Hmar chuan Sports leh politics inpawlh chu a tha lo tih sawiin, politics khelh nana Sports hmang lo turin mipui a sawm a. Tuipui-ral GSA ruahmanna chu tha a tih thu pawh sawiin, an inelna chu a hlu tih a sawi a, infiammi 500 chuang an mikhual thei chu ropui a tih thu pawh sawiin, hruaitu nih chu a hautak thu leh, pawisa leh tha an seng nasa tih a sawi a, an inpekna fakawm a tih thu a sawi a. Heng intihsiakna hi awmze nei zawka buatsaih a nih zel theih nan ngaihtuahna sen a tul thu pawh sawiin, Sports discipline hrang hrang telh zel a tul thu a sawi a. Sports discipline hrang hrang ti chhin turin inkhel mite pawh fuihin, Olympics-ah pawh Medal la pha an la ni thei tih sawiin a fuih nghal bawk.

Sports Minister Lalnghinglova Hmar hian Lianpui Middle School in an mamawh em em Computer chu sawrkarin a pe thei dawn a ni tih a sawi nghal a, Tuipuiral GSA chu Sports hmanrua hrang hrang a pek bakah Tuipuiral GSA tanpuina pek thin chu Rs. 50,000 atangin Rs. 1,00,000-ah nakum atangin tihsan a ni ang tih a puang bawk a ni.

He hun hi Tuipuiral Games & Sports Association (GSA) Treasurer Pamunga'n a kaihruai a, General Secretary Samuel Lalrinsanga'n inhmelhriattirna neiin report tawi a pe a. Thusawi leh intihhlimna chi hrang hrang - malzai, lam etc. a awm bawk a, jersey tlangzarh nghal bawk a. Mizoram State Sports Council Secretary Henry C. Lalrawnkima leh khaw hrang hrang GSA member te leh khawtlang hruaitute an tel a ni.