END Minister hovin ruihhlo do sawihona neih a ni

Excise & Narcotics Minister Lalnghinglova Hmar hovin nimin khan Champhai DC Conference Hall-ah Champhai-a sawrkar leh khawtlang hotuten ruihhlo do chungchang an sawiho.

Nimin a sawihona hunah hian END Minister Lalnghinglova Hmar chuan Champhai District chu Border District a nihna angin ruihhlo lut leh chhuak a tam bik tih sawiin, Mizo mipuite ruihhlo in a tihbuai loh nan Champhai District chuan chanvo lian tak a nei tih a sawi a. Khawtlangah mipui, a bikin naupang leh thalai zingah Kohhran te, khawtlang te leh sawrkarin ruihhlo ti lo turin auchhuahpui nasa zual turin a chah bawk a, kumin chhungin School tinah Awareness Campaign vawi khat tal buatsaih theih nise a ti bawk.

Kum kalta 2025 chhung khan Champhai District-ah hian NDPS Act hnuaiah thubuai 149 ziahluh niin mi 260 an man a, Heroin kg 38.477, Methamphetamine kg 622.4, Crystal Meth kg 5.169, Caffeine kg 3,000, Alprazolam kg 4.470 leh Corex gram 1.6 an man bawk. Nikum chhung vek khan Ruihhlo man runpui ‘Operation Jericho’ kalpui a ni a, nikum khan Phase-I kalpui niin mi 52 manin motor 17 an man a, Heroin kg 9.235, Methamphetamine kg 74.852 leh BEDC litre 565 an man a, kumin January atanga March thla thleng hian Phase-II kalpui leh tura ruahman a ni.