Mizoram Legislative Assembly hnuaia Committee on Petitions Chairman-in sawifiah

Higher & Technical Education (H&TE) Department-in PM-USHA hnuaia Tender a chhuah chungchanga Petition awm avanga Mizoram Legislative Assembly hnuaia Committee on Petitions thurel (Report/Recommendation) Assembly Speaker hnena an thehluh chu an Chairman T. Lalhlimpuia MLA chuan a sawifiah.

Hemi chungchanga thuchhuah a siamah Committee on Petitions 2025 Chairman T. Lalhlimpuia MLA chuan Committee on Petitions-in PM-USHA chungchanga a thurel (Recommendation) chu Tender chungchang, thil hmanhmawhthlak leh hunbi nei a ni tih sawiin, “DD News in Social Media-a caption a siamah ‘PM-USHA hnuaia sum kal fello chhui tura Committee din in Speaker hnenah Report an thehlut; Tender chhuah nawn an rawt’ tih hi Committee on Petitions chuan sum kal fello a chhui lo a, tin, PM-USHA chungchang chhui turin Committee hran a din lo a, Special Report a thehlut lo bawk,” a ti.

Committee on Petitions 2025 Chairman chuan, “Tendering process chungchang a ni a, sum chungchang a ni lo. Tender process chungchanga hrilhfiah dan (Interpretation) inan loh avanga thil fello awm nia lang a chhui a, Tender nawn (re-tender) turin recommendation a siam mai a ni. Tin, tuna PM-USHA chungchang bakah hian thu (issue) dang pahnih bawhzui lai a nei mek bawk a ni,” tiin Committee on Petitions te chuan an hnena Petition lut, enchian zui ngai leh tul nia a hriatte chu a ngaihtuah thin thu leh hetiang a sum kal fello chhui tura a hranpa leh a bik taka Committee din ni anga sawi chu thu diklo a nih thu a sawi a ni.

Committee on Petitions Chairman chuan Committee on Petition in PM-USHA chungchanga a thurel (Recommendation) chu Mizoram Legislative Assembly Rules of Procedure and Conduct of Business Chapter XXVIII 227 in a tarlan angin thuruk (confidential) a vawn tur anih thu leh Member hi Speaker hnena recommendation a thehluh bak chu Committee on Petitions hian thildang emaw kawng dang a tihzui tur a pe lo tih pawh a sawi a. “Committee on Petitions chuan Mizoram Legislative Assembly Rules of Procedure and Conduct of Business Chapter XXVIII 228 in a phal angin member zing a mi hian Speaker hnena Report/Recommendation a pek bak Press hma a puanchhuah emaw, tu hnenah pawh Committee a thurel puanchhuah chungchang hi a rel lo a, a hriatpui lo. Hetianga thiltih a awm anih chuan “Rules of Procedure and Conduct of Business in Mizoram Legislative Assembly” dan kalh a ni ang,” tiin Mizoram Legislative Assembly Rules of Procedure and Conduct of Business, Chapter XXVIII - 228 in a phal angin Committee aiawha Report thehlut tur pawh ruat a nih thu a sawi a ni.