Nikum chhungin TB vei hmuhchhuah 2,275 awm

Nikum 2025 chhung khan Mizoram-ah TB natna vei mi 2,275 hmuhchhuah niin heng zinga mi 1,911 te chu enkawl dam an ni.

National Health Mission (NHM) Mizoram hnuaia National TB Elimination Programme hotute hnen atanga Akashvani News Aizawl thudawn danin, nikum 2025 chhunga Mizoram-a Ngawr natna tia hriat thin, TB vei mi 2,275 hmuhchhuah zinga mi 2,134 hi kum 14 chunglam an ni a, kum 14 hnuailam mi 141 an awm bawk a. TB vei hmuhchhuah tharte hi sawrkar hmun, Damdawi In leh a dangte atanga hmuhchhuah 1,900 leh Private hmun atanga hmuhchhuah 375 an ni a; TB leh HIV vei kawp mi 267 hmuhchhuah niin TB vei zingah a bika enkawl ngai, MDR-TB vei mi 146 hmuhchhuah thar an awm bawk.

Nikum chhunga TB vei hmuhchhuah tharte hi mipa 1364 leh hmeichhia 911 an ni a; nikum chhung vek khan Mizoram-ah TB vanga thi mi 145 an awm laiin TB vei enkawl dam 1911 an awm a, TB vei enkawl damte hi TB vei hmuhchhuah zinga za zela 84 a tling phak a ni.

Health Department hnuaia District then danin, nikum chhung khan Aizawl District-ah TB vei mi 1569 hmuhchhuah niin an tam ber a, Lunglei District-ah mi 155 hmuhchhuah niin, Siaha District-ah mi 123, Champhai District-ah mi 71, Kolasib District-ah mi 138, Serchhip District-ah mi 52, Lawngtlai District-ah mi 123 leh Mamit District ah mi 44 hmuhchhuah an ni bawk.