Biometric Enrolment kalpui zel

Mizoram-a awm mek Myanmar raltlante mit naute leh kutze thla chhinchhiah hna kal mekah raltlan awm zat atanga chhutin za zela 80 thelh chhinchhiah an ni tawh.

Home Department atanga thudawn danin Krismas leh kum thar vuakvet velah pisa kai hun a tlem hle chungin Mizoram-a Myanmar raltlante Biometric Enrolment kalpui mek chu chhunzawm zel a ni a. Zirtawpni kalta thleng khan raltlan awm mek mi 30,463 zinga mi 24,191 te Biometric Enrolment tihfel a ni a, hei hi za zela 79.41 a ni a. Aizawl, Lunglei leh Serchhip District-ah te chuan Myanmar raltlan awm zawng zawngte mit naute leh kutze thla chhin-chhiah vek a ni tawh a. Khawzawl District-ah za zela 94.19, Kolasib District-ah za zela 93.55 leh Mamit District-ah za zela 90.58 zawhfel a ni tawh bawk. Myanmar raltlan tamna ber Champhai District-ah chuan za zela 79.31 zawhfel a ni a, raltlan tamna ber dawttu Lawngtlai District-ah erawh za zela 53.33 chauh zawhfel a la ni.

Champhai District-ah hian Myanmar raltlan mi 13,098 an awm mek a, Lawngtlai District-in dawtin raltlan 6,017 an awm a, a pathumna Aizawl District-ah raltlan 4,159 te chu Biometric Enrolment tih zawh vek a ni tawh a ni.

Bangladesh atanga raltlan lo lut-te Biometric Enrolment pawh za zela 13 chuang zawhfel a ni tawh a, Banglades atanga raltlan awm tamna ber Lawngtlai-ah erawh hna tan a la nih loh laiin Aizawl, Lunglei leh Serchhip District-ah te chuan bangladesh atanga raltlan te Biometric Enrolment chu zawhfel a ni tawh a ni.

Hemi hmalam hian Home Minister K. Sapdanga chuan Myanmar leh Bangladesh atanga raltan Mizorama awm  mekte chu ngawrh takin an Biometric Enrolment chu tih mek a nih thu a sawi a, Biometric Enrolment an kalpui mek chu a zawh hun sawi theih a nih loh thu leh a nawlpui erawh chu peih fel tep a nih thu a sawi a ni.