Kawtchhuah ropui-a hmalakna Minister in enfiah

Champhai District chhung Vangchhia khuaa Kawtchhuah Ropui, Zofate Thlangtlak Gate-a PRASHAD (Pilgrimage Rejuvenation & Spiritual Augmentation Drive) hnuaia project kal mek - Cultural & Heritage Centre-a hmalakna chu nimin khan Tourism Minister Lalnghinglova Hmar chuan a hmunah a tlawh.

Vangchhia-a project hi ‘Development of Basic Amenities under PRASHAD Scheme at Vangchhia’ tih niin cheng vbc. 5.4732 ruahman a ni. A hmunah hian Rainwater Harvesting Tank te, Solar Streetlight leh khualzin mamawh leh lawm tur tam tak siam tum a ni. Kawtchhuah Ropui hi Archaelogical Survey of India hnuaia Protected Monument niin ‘Menhirs and Caves at Vangchhia’ tih a ni.

Nimin-a helai hmun a tlawhnah hian Tourism Minister chuan Tourism-ah khawtlang leh mipui nen inkungkaihna tha a awm a tul thu sawiin, Project tantu chu sawrkar ni mahse, a thawk hah tur leh a hlawkna tel tur chu mipui an nih thu a sawi a, Mizoram hmun hrang hrangah khualzin hip tura hmunhma leh event siamchawp a ngaih laiin Vangchhia chuan mikhual hiptu tha tak an neih sa avangin an vannei hle tih sawiin, mikhual tam zawk an neih zel theih nan project kal mek tha taka lo enkawl tur leh mikhual lo chhawn tha zel turin a fuih bawk.