Nikum chhungin Mizoram-ah ruihhlo hmansual vangin mi 111 zetin nunna an chan

Nikum (2025) chhung khan Mizoram-ah ruihhlo kaihhnawh avangin mi 111 an thi nia chhinchhiah a ni a, kum 20 liam ta chhunga ruihhlo kaihhnawih avanga thi an tam ber kum a ni.

Excise & Narcotics Department bakah Mizoram Police lam chhinchhiah danin nikum chhunga ruihhlo kaihhnawih avanga thi 111 zinga mi 93 chu mipa niin midang 18 chu hmeichhia 18 an ni a, nikum kha kum 2004 hnua Mizoram chhunga ruihhlo kaihhnawih avanga thi an tam ber kum niin kum 2004 kha chhinchhiah chinah ruihhlo avanga Mizoram-a thi an tam ber kum a ni a, khami kum khan ruihhlo hmansual avanga thi mi 143 zet awmin Central YMA chuan Ruihhlo Do chu kumpuan-ah hmangin SRS dinin nasa taka ruihhlo do a ni a, a kum leh, kum 2005-ah chuan ruihhlo vanga thi zat hi 42-ah a tla thla a ni. Nikum chhunga ruihhlo vanga Mizoram-a thi zingah hian Heroin leh damdawi dang tihpawlh vanga thi an tam ber a, Heroin chauh khawih avanga thi pawh an tam hle a. Kum 1984-a Heroin avanga Mizoram-a thi mi pakhat an chhinchhiah atanga tun thlengin ruihhlo vanga thi hi mi 1,990 an tling tawh a, Mipa 1,747 leh hmeichhia 243 an ni tawh a ni.

Mizoram-a ruihhlo vanga thite hi chawhrualin kum 14 leh kum 57 inkara upa an ni a, Mizo thalaite’n kum 1990 chho vel atanga an hmansual tan nachhawkna chak tak, Spasmo Proxyvon leh Parvon Spa chuan nunna a suat tam ber a, mi 1,161 zetin an thihpui hman a, sawkar laipui-in siamchhuah a khap hnuah kum 2017 atang kha chuan he damdawi avanga thi hi an awm zui ta lova. A dawt lehah chuan Heroin emaw, Damdawi dang chi hrang hrang tihpawlh vanga thi an tam leh a, Heroin vanga thi in a dawt a ni.

Tunhma khan Mizoram-ah Heroin leh damdawi ruihtheih dang emaw, damdawi ruihtheih chi hrang hrang khawih pawlh vanga thi hi an awm meuh lova. Kum 1984 leh 1998 inkar chhung khan chutiang vanga thi chu chhinchhiah an awm lo a ni. Kum 1999 leh 2006 inkar (kum 7) chhung khan hetianga damdawi khawih pawlh vanga thi hi mi 17 an awm a, kum 2007 atang khan an awm lo leh vang vang a, kum 2007 leh kum 2011 inkar pawh khan hetiang vanga thi hi chhinchhiah an awm lo leh a. Kum 2012 atanga awm leh tanin kum 2013 atang phei kha chuan thihphah an tam chho ta hle a ni.