Ruang phurh man dilna Portal siam a ni

Mizoram sawrkarin khualkhuaa thite ruang phurh man a tumsak thin chu online hmanga dil theih turin portal siam a ni a, tlangzarh thuai beisei a ni.

Ruang phurh man buaipuitu Social Welfare Department hotute sawi danin, ruang phurhna senso sawrkarin a tumsakna hi kum 2024 September thla khan hawn a ni a, hemi kum vek December thla atangin ruang phurh man hi pek tan a ni a. Ruang phurh man pekchhuah a nih atanga nikum December thla thleng khan ruang 1,680 phurh man atan Mizoram sawrkar chuan Rs. 175,85,000 a seng tawh a; kumin ah hian pekchhuah tur engemaw zat a awm leh tawh a ni.

Mizoram sawrkar chuan ruang phurhna senso tur hi kum 2024-25 leh 2025-26 atan budget-ah cheng nuai 500 ve ve a dah a; ruang phurh inkaihhruaina in a tarlan danin, ruang phurh tur chu a thlenna tur km 20 aia hnai a ni tur a ni lo a, km 20 piah lamah chuan tu tan pawh hman theih niin lirthei thlen theih chin a huam a ni. Inkaihhruaina ang chuan ruang phurhna lirthei hman man chu State Transport Authority in rate a siam anga kalpui a ni a, ruang phurhna man sawrkarin a pek sak hian lirthei pakhat chiah a huam a, ruang phurh nana lirthei hman (hire) theihah hian cheng nuai 17 man chin chunglam lirthei a huam lo bawk a ni.

Ruang phurhna hlat zawng chhût nan ruang chhuahna atanga a dahna hmun inkar hlat zawng lâk tur a ni a; lirthei thlen lohna khua a nih chuan lirthei thlen theih tàwpna thleng a ni a. Ruang phurhna chu kawng tawi thei ber hman tur a ni bawk.