April 2024 atanga November 2025 chhungin Mizoram-ah HIV kai mi 3257 hmuhchhuah an ni

April 2024 atanga November 2025 chhung khan Mizoram-ah HIV hrik kai mi 3257 hmuhchhuah an awm a, Health Minister Lalrinpuii chuan HIV/AIDS do kawngah Mizoram sawrkar chuan theihtawp a chhuah reng tih sawiin, kum 2018 atangin HIV kai thar an tlakhniam thu a sawi bawk.

Health Minister Lalrinpuii chuan nimin khan Pisa-ah thuthar thehdarhtute kawmin kum 2024 April atanga nikum 2025 November thla chhung thleng khan Mizoram-ah thisen endik 1,45,525 an awm thu leh heng atang hian HIV hri kai mi 3257 hmuhchhuah an ni tih sawiin, HIV hrik kai hmuhchhuah zinga mi 2125 chu mipa an nih thu a sawi a, hei hi thisen enfiah atanga chhutin za zela 65.2% a nih thu leh hmeichhia HIV kai thar mi 953 hmuhchhuah an awm thu a sawi a, heng bakah hian naupai enfiah atangin HIV kai mi 179 hmuhchhuah an nih thu sawiin, kum 2024 April atanga nikum October inkara nu naupai HIV positive hmuchhuah ART Centre-a ziahluh zawng zawng ten ART an lak mek thu a sawi bawk. Chhinchhiahna atanga a lan danin October 1990 atanga November 2025 chhungin Mizoram-ah HIV kai mi 33,781 an awm hman a, HIV inkaichhawnna kawngah mipat hmeichhiatna hman atanga kai chu 70.4% zet niin zaa 27 chu inchiu atanga inkaichhawng an ni a, nu in a fa a kaichhawn 1.8% niin kaihna chhan hriat loh 0.8% a awm bawk a ni.

Health Minister Lalrinpuii chuan, Mizoram-ah HIV test-na hmun, Integrated Counseling and Testing Centre (ICTC) chu hmun 43-ah a awm thu sawiin, mipat hmeichhiatna hman atanga inkaichhawn theihna natna neite enfiahna leh enkawlna - Designated Sexually Transmitted Infection & Reproductive Track Infection Clinic (DSRC Clinic) pawh hmun 10-ah a awm thu a sawi a. HIV hrik kaite enkawlna leh damdawi lakna (ART Centre) hmun 14 a awm mek tih sawiin, heng ah hian HIV hrik kai mi 18,355 enkawl mek an nih thu a sawi a. HIV kai zinga ART-a enkawlna la mek te zinga 97.7% te chuan Viral Suppression an nei mek tih a sawi bakah Hulhliap Short Stay Centre-ah HIV Testing neih thin a nih thu a sawi a, mi 803 HIV test tawh niin HIV positive 14 hmuhchhuah thar an ni a, heng mite hi ART lak tir nghal vek an nih thu a sawi bawk.

HIV/AIDS do kawngah Mizoram sawrkar chuan theihtawp a chhuah reng tih Health Minister chuan sawiin, Mizoram sawrkar chuan theihtawp chhuah mah se natna an do chu mimal nun khawih, mimal duhthlanna leh chhungkaw inrelbawlna nena kalkawp a nih tlat avangin an duhthusam ang result neih a harsat thu a sawi a, sawrkar hmalakna a hlawhtlin lehzual theih nan mipuite chu a tam thei ang berin thisen test se a duh thu a sawi a. Sawrkar kum kal laiah kawng hrang hranga hmalak a nih thu sawiin, MLA zawng zawng ten HIV/AIDS do nan an MLA Fund atangin Rs 50,000/- theuh an thawhkhawm tih a sawi a, heng sum te hi hmun kilkhawr zawka khawsa, dinhmun harsa bawk si, HIV hrik kai ten damdawi an lak theih nan leh an inenkawlna senso atan hman a nih thu a sawi bawk a. National AIDS Control Organization (NACO) in kum 2025-2026 chhunga India ram State leh UT hrang hranga State AIDS Control Society te hnathawh that dan a tehnaah Mizoram State AIDS Control Society (MSACS) chu pathumna a ni tih sawiin, hei hian AIDS dona kawngah sawrkar chuan theihtawp a chhuah a ni, tih a entir tih a sawi a ni.

He hunah hian MSACS Project Director Dr. Jane Ralte chuan HIV inkaichhawn kawngah National Average chu 0.2 a nih laiin Mizoram chu 2.75 a la nih thu a sawi a, kum 2018 atangin HIV/AIDS kai thar hi a tlahniam nia sawiin, a do kawngah pawh NACO chuan hnathawh that  Ranking a pekah hma an sawn zel thu leh kum 2024-25 ah 5-na niin kum 2025-26 ah 3-na an nih tak thu a sawi a ni.