Nikum-ah Sawhthing lei nan vbc. 138 hman a ni

Mizoram sawrkarin nikum December 12, 2025 thleng khan Sawhthing quintal 3,437 leina (Support Price) atan cheng vbc. 138 a hmang tawh a. Sawhthing hralhna atanga sum hmuhlet chu cheng vbc. 12 a ni.

Directorate of Agriculture & Farmers’ Welfare Department SPIO-in RTI zawhna a chhanna atanga a lan danin nikum chhung (December 12, 2025 thleng) khan Sawhthing leina atan cheng vbc. 138 sen a nih laiin a hralhna atangin Rs. 12,78,07,290 hmuh let a ni a. Sawh-thing hi sawrkarin Secondary Collection Centre (SCC) 62-ah kg khat Rs. 50 zelin a leisak tih SPIO chuan sawi bawkin, SCC leh Buffer Stock Point-te hian lilam (auction notice) siamin a chhang sang apiang hnenah hralh chhuah ngal zel niin a hralhna rate hi kg-ah Rs. 10 atanga Rs. 30 inkar a ni tih RTI chhannaah chuan tarlan a ni.

SPIO chuan Sawhthing lei a nih theihna atana senso tarlangin Administrative Cost-ah Rs. 37,40,445; Transportation Cost-ah Rs. 99,05,771 leh Operational Cost-ah Rs. 1,87,30,391 hman a ni tih tarlangin, sawrkarin Sawhthing a lei hi hralh zawh vek tawh niin a bâng a awm lo tih a sawi a. Sawhthing leina (support price) hi a dawngtu tur dik tak, kuthnathawktute hnenah pek kim thawkhat an ni tawh tih a sawi a; amaherawhchu, SCC leh District Agricultural Marketing Committee (DAMC)-ten tihhmaih palh leh siam that ngai an nei nual a. Siam that leh tih dik hna thawh mek niin pek kim loh zat leh pek leh tur awm zat chiang taka sawi theih a la ni lo tih a tarlang a. Sawrkarin Sawhthing a lei zingah sawngnawi, khawro leh hralh tlak loh paih quintal 2,386 a awm tih a sawi bawk.

Mizoram sawrkar thuchhuah tarlan danin sawrkar chuan February, 2026 atangin Sawhthing hi a lei chhunzawm leh dawn a. Nikum chhung khan Buhhum quintal 1,473 leh hmunphiah ro quintal 2,498 chu lei a ni bawk.