MUHCS atangin cheng vbc. 112.52 pek a ni tawh

Mizoram sawrkar chuan a thlawna damlo enkawl theihna tura Scheme a duan, Mizoram Universal Healthcare Scheme (MUHCS) hmangin MUHCS kalpuitu damdawi In te hnenah damlo an enkawlna senso atan cheng vbc 112.52 a pe tawh a; Mizoram-a Private damdawi In 13-ten MUHCS zawm tumin sawrkar nen an indawr mek bawk.

Mizoram State Health Care Society (MSHCS) hotute chuan Akashvani News Aizawl zawhna chhangin, MUHCS hi nikum (2025) April ni 1 atang khan kalpui a ni a, tunkar Thawhtanni, January 12 thleng khan MUHCS kalpuitu damdawi In te hnenah sawrkar chuan damlo an enkawlna senso atan cheng vbc. 112.52 a pe tawh a, hei hi damlo 66,595 enkawlna senso a ni.

Mizoram-a Private Hospital 15-in MUHCS hi an kalpui mek a,chung zinga pasarih chu Aizawla mi an ni a; Lunglei-ah Damdawi In pathum, Siaha-ah pakhat leh Champhai leh Lawngtlai-ah damdawi In pahnih ve ve in an zawm tawh a, Aizawl-a Private Day Care Centre pathumin MUHCS an zawm bawk.

Health Care Society hotute chuan tunah hian Private Hospital 13-in MUHCS zawm an duh avangin indawrna an neihpui mek thu an sawi a; Private Hospital te hi a mal mala indawrna an neihpui thu leh damlo enkawlna senso (rate) velah inremna an zawn mek thu an sawi bawk. Private Hospital 13 MUHCS zawm duha sawrkar dawr mekte chu Aizawl-a Damdawi In 11 - Alpha Hospital, Agape Hospital, Aizawl Hospital & Research Centre, Greenwood Hospital, City Hospital, Ramhlun Venglai leh College Veng a LRM Hospital, Adventist Hospital, Ebenezer Medical Center, Trinity Hospital, Rosewood Hospital, Care Hospital te bakah Serchhip-a Mercy Hospital  leh Lunglei-a Hope Hospital te an ni.