Central YMA Team ten KSD Road siam mek leh Sairang to Vairengte kawng siam mek an enfiah

Central YMA Road Monitoring Committee chuan Inrinni khan Central YMA President R. Lalngheta hovin Kawnpui-Serkhan-Durtlang kawng (KSD Road) siam mek chu a hmunah an enfiah leh a, he kawng hi BRTF hnuaia Contractor, BRN Infrastructures Private Limited-in a siamthat hna an thawh mek niin tun tum hi an enfiah vawi hnihna a ni.

Central YMA Road Monitoring Committee hian Kawnpui-Serkhan-Durtlang kawng (KSD Road) siamthat hna thawh mek chu an duh khawp loh lai leh hna chak zawka an thawh dan turte Contractor hi an sawipui a, anni pawhin tha zawk leh chak zawka thawh an tum thu an lo hrilh a. Kawng siamna hmunah hian Central YMA Team te hian Alkatra (bitumen) chawhpawlh sat zâwng (temperature) pawh an endik nghal a. Endikna atangin temperature chu Degree Centigrade 142 lai a sa a tlin avangin lâwmawm an tih thu an sawi a. Amaherawhchu, Thlasik khaw vâwt hnuaia kawng chhuata an chap darh chhûngin Temperature hi a tlâkhniam chak êm avângin a theih chin chinah chak zâwk leh rang zawka khâwl hmanga a chap darh hna hi thawk tûrin BRTF leh Contractor te hi an hrilh zui nghal a ni.

Central YMA Road Monitoring Committee hian Inrinni vek khan Sairang to Vairengte kawng siam mêk pawh an endik nghal a. Helai kawng hi NHIDCL hnuaia Company hrang hrangte thawh niin Company-te hian an harsatna te lo thlenin, Central YMA hruaitute hian a theih dan ang angin hma an lakpui zui nghal a. Sawrkar thuneitute pawh biaksak nghalin, Company lam pawh an lawm hle a, phur tak chung leh chak zawka hmalak an tum thu an sawi ve bawk a. Central YMA hruaitute chuan kawng siamtu Contractor hrang hrangte hi Furpui lo thlen hma ngeia an hnate thawk zo ngei tûrin an hrilh a ni. 

Nikum December ni 16-a kawng siam hna an endikna leh chak zâwka hna thawk tûra Central YMA ngenna chuan awmzia a nei hle tih an hmuh thu Central YMA hruaitute chuan sawiin, Hnathawhna hmanrua leh khawlte pawh an lo in chhawp kim viau tawh tih an hmuhin lawmawm an ti hle bawk a. Contractor la inpeih fel chiah lo te pawhin kumin January ni 13 atang chuan an khawl bun thar te pawh an hman theih tawh tûr thu sawiin, a chak thei ang bera hna an thawh nghâl tûr thu Central YMA Team te hi an hrilh bawk a ni.