Lawngtlai leh Myanmar ramri khar chu hawn a ni leh tawh

Tuihri leng avanga Lawngtlai District leh Myanmar inkalpawhna khar chu hri leng a ziaawm hnuah hawn a ni leh ta.

    Lawngtlai District Magistrate Donny Lalruatsanga chuan tuihri leng avanga nikum December ni 23 atanga Lawngtlai District leh Myanmar inrina zawng zawng kharna thupek a lo chhuah tawh chu hlipin Inrinni atang khan ramri hi hawn a ni leh tawh a. Lawngtlai-a Lairam Christian Medical Centre & Hospital-a tuihri kai mi 8 enkawlte pawh an dam leh vek tawh a, hri kai belh an awm lo bawk a ni. Lawngtlai District-ah hian Tuihri leng avangin nikum November thla khan mi 6 an thi a, December thla khan mi 4 thi lehin Tuihri natna len vangin mi 10 an thi hman a. Hri leng hi a tirah enge a nih hriat a ni mai lova, ZMC&H Laboratory-a endik a nih hnuah Tuihri a ni tih finfiah a ni. Tuihri len vena tho Siaha District-ah chuan hri leng a ziaawm hma avangin Dec. ni 23 atanga ramri khar thupek chhuah chu January ni 4 khan hlih a lo ni tawh a, Siaha District-ah hian November thla khan tuihri natna avangin mi 3 thiin December thla khan hri kai mi 6 awm leh mah se thihpui an awm tawh lo a ni.