CADC chu Governors’ Rule hnuaiah awm zui dawn

Chakma Autonomous District Council (CADC)-a Governors Rule chu thla ruk (6) dang atan pawhsei leh a ni.

Hemi chungchanga Mizoram Governor thuchhuah tarlan danin, Governors Rule hi tun thla ni 7 atanga hman tan turin thla ruk (6) dang atag pawhsei a ni a, he thutlukna siam anih chhan hi CADC-a Member of District Council (MDC) zingah party zuanlawr avanga sawrkarna siam hlei thei lova an awm thin vang leh Inquiry Commission Report nghah mek a nih vang tih thuchhuahah chuan tarlan a ni bawk a. Governor’s Rule chhung hian Chakma Autonomous District Council (CADC) thuneihna leh kalphung zawng zawng chu Lawngtlai District Deputy Commissioner-in Governor aiawhin a enkawl ang.

Governor hian CADC chhunga sawrkar ngelnghet din theih loh chhan leh an politics te zirchiang turin Lawngtlai DC kaihhruai Inquiry Commission din thar a nih thu niminpiah khan thuchhuah siamin a sawi a, CADC inrelbawlna chungchang bakah hnalak chungchanga thil fello awm te enfel tura tih a ni a. Hemi chungchang hi Council of Minister te a rawn hnuah, anni chuan chhui nawn ngai ti lo mahse chhui nawn a duh zawk avangin chhuitu tur Inquiry Commission hi din a ni tih thuchhuahah chuan a sawi bawk.

CADC-ah hian ZPM chuan MDC 16 a neih thu chhalin tun thla ni 7 khan MDC te hian sorkarna an siam theih thu Governor an hrilh a, hemi hnu ni 13 khan ZPM MDC16 zinga 5 in BJP an zawm leh a ni.

Hetihlai hian BJP Mizoram Pradesh chuan Mizoram-a Autonomous District Council pahnih-a sawrkarna ngelnghet a ding thei lo chu pawi an tih thu a sawi a; Autonomous District Council-ah Anti-Defection Law hman a nih theih nan hma an lak thu an sawi a. BJP Mizoram State General Secretary Delson Notlia chuan nimin-a Aizawl Press Club-a thuthar thehdarhtute nen an inkawmna ah zawhna chhangin Governor hian CADC-ah thil dik lo a awm ngei nia a hriat avangin Governor's Rule chu a pawtsei niin a lang tih sawiin, BJP chuan sawrkarna siam turah tel ve ngei an duh thu a sawi rualin, Political development kal mek a nih avangin thuchiang a sawi theih loh thu a sawi bawk.

BJP chuan Autonomous District Council-ah te hian sawrkar ngelnghet awmse an duh thu leh thlantlin tawh ten an awmna party an thlak fo thin chu a tawp theih nan ADC-ah Anti-Defection Law hman an duh tih an sawi a, 6th Schedule hnuaiah hian India ramah District Council 10 an awm a, Supreme Court-in heng Council-te hian 10th Schedule hnuaia Anti-Defection law chu an hman ve thei loh avangin tun thleng hian ADC-ah party inthlak a awm tih sawiin, hei hi an vei thu leh hemi titawp tur chuan 6th Schedule hi tihdanglam a ngaih thu a sawi a ni.