Bike intlansiak-a lawmman dawngtu lawmpuina hlan
Aizawl Electric Veng-a cheng K. Lalnunsanga hian MRF leh Madras Motorsports Club in an buatsaih Federation of Motor Sports Clubs of India (FMSCI) Indian National Motorcycle Racing Championship (INMRC) 2025-ah tock 130 - 165cc Novice Category-ah inelna ah telin a pumpuiah pahnihna a ni a. June 2025 atang January 2026 chhung khan Round nga inelna neih niin intlansiak vawi 10 tlan a ni a, Nunsanga hi vawi hnih pakhatna niin vawi li pahnihna a ni.
Nimin-a K. Lalnunsanga lawmpuina hun Minister Pisa-a neih ah hian Sports Minister Lalnghinglova Hmar chuan, “Kan infiammite tupawhin hlawhtlinna an chan hian sawrkar chu kan lawm thin,” tiin “India ram huap ang inelnaah phei chuan Mizo tihmingthatu an ni a, kan chhuang thin a ni. Nunsanga pawh National Level-a hetiang a thleng thei hi kan lawm hle,” tiin a lawmpui thu a sawi a. Mizoram MotorSports Association hruaitute chu fak bawkin, “MIMSA inpekna hi a hlu a, Motorsports lam hi a senso te a danglam deuh avangin a hautak hma a, Mizoram State Sports Council in budget tam tak kan pe thei lo chung pawhin hruaitute lam an tang hram hram thin a, fak an phu tak zet a ni,” a ti bawk.
He hunah hian Nunsanga chuan an inel dan chungchangte leh a hun zuk hman dante a sawi a. MIMSA lam pawhin thu sawiin Sport Minister in a duhsakna leh ngaihsakna avangin lawmthu an sawi a. Minister hian lawmpuina pawisafai a hlan nghal a ni.