Uluk taka an zirchian hnuah Chief Minister’s Rubber Mission an kalpui tih Chief Minister in a sawi

Chief Minister Lalduhoma chuan Chief Minister Rubber Missions chu mawlmang taka kalpui lovin zirchian hnuah kalpui a ni tih a sawi.

Land Resources, Soil & Water Conservation Department chuan Mizoram Chief Minister's Rubber Missions hnuaia rubber chingtute tan nimin khan Rubber chin dan, a seng dan leh a seng hnua a sawngbawl zui dan leh a kung enkawl dan zirna (Scientific Training) chu Vanapa Hall-ah hmangin he hunah hian Chief Minister Lalduhoma chuan UT kan nih ata kum sawmnga kan pelh hnuah loneia eizawng kan tam chungin eng thlai mah kan hmingthanpui ngai lo tih sawiin, “A thlan tla nasa, a kut durh nasa te hi kan rethei em em thin. Mipui sawrkar kan han ding a, kan Policy te kan han tipuitling chhova, hun reiloteah Ginger Capital of India-ah min puang ta a ni,” a ti a. Kan hmingthanpui theih thlai tha ber pakhat chu rubber hi a ni tih pawh sawiin, “Kan ram hi Rubber tharchhuahna hmunpuia chantir tumin Chief Minister Rubber Missions kan duang chhuak ta a ni. He Missions hi mawlmang takin kal kalpui lova, Rubber Board of India te nena uluk taka kan sawiho hnu leh Tripura Rubber Missions kan zirchian hnua kan kalpui a ni,” a ti.

He training hi Land Resources, Soil & Water Conservation Secretary R. Lalmuankimi chuan kaihruaiin LR, SWC Minister Lalthansanga pawhin thu a sawi a, he hunah hian Rubber Board of India leh Servo Lubricants (IOCL) atanga mithiam lo kal ten Rubber chingtu mi 550 te hnenah Rubber chin dan leh enkawl zui dan te, Rubber hnai dan te, Rubber hnai sawngbawl dan te bakah Rubber kung tichhetu rannung laka ven dan te zirtirna an pe dawn a. Mizoram-ah hian Rubber chin theihna ram Hectares 50,000 vel a awm a, rubber hi thlai nghet, ramngaw siam thei thlai, tuihna humhalh kawnga tangkai, a hralhna tha tak, a hnai theih tawh loh hnua Thingzai atana hman zui theih ni si a nih avangin Mizoram Sawrkar chuan uar zawka kalpui a tum a. October 18, 2024 khan Chief Minister’s Rubber Mission chu dinin, he Mission hnuaiah hian Land Resources, Soil and Water Conservation Department chuan kum 2025 kum tir atang khan hma la tanin, Mamit District leh Kolasib District chhunga ram 1000 hectare a zauah Rubber tiak kung 4,50,000 phun a ni tawh a, kum 2026 hian District hrang hrang pariat a ram 2,575 hectare a zau-ah Rubber tiak kung 11,58,750 phun chhuah leh vek tum a ni. Kum nga chhung kalpui tura duan niin, ram 11,500 hectare a zauah Rubber phun khah vek tum a ni.

Rubber chinna hmunte hi kawng sialsak an ni ang a, Rubber Roller Machine leh a hnaina hmanrua ngaihtuahsak an ni ang a, a hralhna pawh ngaihtuahpui an ni bawk ang. Kumin bikah hian rubber chinna hmun 11-ah huan panna kawngpui kilometers 46.50 laih hman tum a ni.