Kum 5 chhungin lirthei chesual ah mi 100 an thi

Kum 2020 atanga kumin (2025) September thla thleng khan Aizawl Municipal Corporation (AMC) huamchhunga lirthei chetsualna thlenga nunna chan mi 100 an awm tawh a, kumin ah mi 13 in nunna an chan tawh bawk.

Aizawl Traffic Police hotute hnen atanga Doordarshan Palai thudawn danin AMC huamchhungah hian kum 2020 atanga kumin 2025 September thla thleng khan lirthei chetsualna tum 141 thlengah mi 100 in nunna chanin hliam tuar mi 114 an awm a. Kumin bikah January atanga September thla thleng khan lirthei chetsualna tum 26 thleng tawhin mi 13 in nunna an chan a, hliam tuar mi 14 an awm bawk. Police te chhinchhiah danin nikum chhung khan lirthei chetsualna tum 26 thlengin mi 26 in nunna an chan a, kum nga kalta chhunga lirthei chetsualna avanga nunna chan tam ber kum a ni.

Kumin January atanga September thla chhung khan lirthei neitu leh khalhtu dan bawhchhia man mi 7062 awmin Two Wheeler khalhtu dan bawhchhia man tam berin mi 5126 man an ni a. Driving licence nei lova lirthei khalh mi 323 man an ni tawh bawk. Hei bakah hian hlauhawm taka midang tana him lova lirthei khalh mi 62 man awm bawkin AMC huamchunga Traffic Police ten an man tam berah Motor Vehicle Rules bawhchiatna a man mi 2251 an awm bawk. Kumin January atanga September inkar chhunga lirthei khalhtu leh neitu dan bawhchhia mi 7062 man atanga Aizawl Traffice Police ten sum an chawitir chu Rs. 62,73,200 a tling a ni.