Sum kaihhnawiha inbumna thubuai Mizoram-ah a tam

Kum 2020 atanga kumin 2025 October thla thleng khan Mizoram Police Cyber Crime Police Station-ah sum kaihnawih thila inbumna, Financial Crime thubuai 197 chu chhuizui tura ziahluh a ni tawh.

Internet hmanga inbumna leh intihhmingchhiat thubuai chhui tur Mizoram-ah a tam tial tial a; Cyber Crime Police Station hotute sawi danin, Cyber Crime Police Station hnuaiah kum 2020 atanga kumin October thlengin thubuai 2326 chu chhuichianna neih a ni a, chhuizui tlak leh enfiah zui ngai thubuai 350 ziahluh a ni. Cyber Crime Police Station hnuaiah hian kum 6 chhunga complaint lut zingah Internet tipline kaltlanga inbumna 6250 lut a awm a; Criminal complaint 34 a awm bawk a. CCPS te hian case an chhuifiah atanga Court lama ngaituah turin case 115 chu kum 6 chhung hian an peihfel tawh a ni.

Police Cyber Crime Police Station hnuaia case ziahluh zingah hian Mizoram chhung bakah rampawn atanga thubuai ziahluh a awm bawk a, tunah hian rampawn atanga thubuai ziahluh 20 chu chhuichian mek niin National Cyber Crime Reporting Portal-ah kum 6 chhungin case 1453 ziahluh a ni bawk. 

Kum 2020 atanga kumin October chhunga thubuai hrang hrang ziahluh ah hian mi 131 man an ni a, kumtlinglo engemawzat awmin thubuai 72 chu hremna pek an ni tawh a. Thubuai ziah luh zingah hian hursualna lam kaihnawih chu kum 6 chhungin thubuai 67 ziahluh niin naupang kumtlinglo laka hleilenna thubuai 16 ziahluh a ni tawh bawk.