Bus thlen tlai vangin Transport Department in thupha an chawi

Transport Department chuan November ni 1, 2025-a Rel hmanga Guwahati-a kal tur khualzinte MST Bus-in a hun taka a thlenpui hmanloh avangin thupha an chawi a, hetiang thil a thlen nawn tawh loh nan Guwahati kal tur bik tan Aizawl-a Transport Complex atanga Bus chhuah hun hi darkar khat-a sawn hma a nih thu an sawi.

    Nimin-a thuchhuah an siamah Transport Department chuan September 13, 2025-a Sairang Rel Station hawn a nih hnuah khualzin ten veivahna chungchangah harsatna an tawh loh nan September ni 29, 2025 atang khan MST Bus chu Aizawl leh Sairang Rel Station inkarah Service tir a nih thu sawiin, Khualzin chi hrang hrang Delhi, Kolkata leh Guwahati atanga lokal te phur hian MST Bus vawi 79 kal tawhin, passenger 3196 zet an phurh tawh thu an sawi a. Heng Passenger te hi a hun taka thlenpui vek an nih thu leh November ni 1, 2025-a Guwahati-a kal tur Passenger te a hun taka MST Bus in a thlenpui thei lo chu pawi an tih thu an sawi a. November 1, 2025 khan MST Bus hi Transport Complex, Chaltlang atangin tlai dar 5:00-ah chhuakin Traffic jam nasa vangin zan dar 7:00-a Rel chhuak hi an nang hman ta lo tih an sawi a. He thil thleng hi Department chuan pawi a tih thu leh an Passenger phurhte chungah pawh ngaihdam an dil mawlh mawlh tih sawiin, “Hemi chungchang ngaihtuah hian Department hotute pawh an inhmukhawm nghal a, tunhnuah Bus a thlen tlai tawh lohna turin Guwahati kal tur bik tan Transport Complex atanga Bus chhuah hun hi darkar khat-a sawn hma a ni,” tiin MST Bus tlan dan Schedule thar an ti chhuak nghal bawk.