Thla 7 chhungin lirthei ziahluh 17,656 a awm

Sawrkar kum kal mek 2025-26 chhunga thla sarih chhungin Mizoram sawrkar Transport Department chuan lirthei 17,656 a register thar tawh a, heng zinga 13,849 chu Two Wheeler niin lirthei mal register ah a tam ber a ni a, lirthei register thar zawng zawng atanga chhutin za zela 78.44 a tling a ni.

Transport Department-in lirthei ziahluh zat a tarlan danin, kumin March ni 31 khan Mizoram-ah lirthei register 3,32,185 a awm laiin thla hmasa October ni 31 khan lirthei register 3,49,841 a awm tawh a; sawrkar kum kal mekah April ni 1 atanga October ni 31 thleng khan thla 7 chhungin Mizoram-ah lirthei 17,656 ziahluh thar a awm tihna a ni. Thla 7 chhunga lirthei ziahluh thar zingah hian Two Wheeler 13,849 awmin a tam ber a, Two Wheeler dawta register tam ber chu Car niin 2,502 register a ni a; Two Wheeler leh Car ziahluh thar zat inthlauhna hi 11,347 a tling a ni.

Transport Department-in a tarlan danin, Mizorama lirthei register tam ber chu Two Wheeler a ni a, tun thlengin Two Wheeler 2,43,016 register tawh niin Car 57,836, Bungraw phur lirthei chi hrang hrang 24,513, Auto Rickshaw 6,381, Four Wheeler Taxi 5,870, Two Wheeler Taxi 4,121 leh Maxi Cab 2,385 te chu a tam zual an ni bawk.