Ranvulhtute tan Livestock Insurance kalpuiin Thlai chingtute tan Crop Insurance kalpui tum a ni

Mizoram sawrkar chuan ranvulhtu, a bikin Bawng, Vawk leh Kel vultute tan an ranvulh ah Livestock Insurance a kalpui dawn a, tunah hian Insurance kalpuitu tur Company zawnna atan Tender chhuah tura peihfel tawh niin Tender tihchhuah thuai tum a ni.

AH&Vety Department hotute chuan Akashvani News Aizawl zawhna chhangin, National Livestock Mission (NLM) Scheme hnuaiah Ran Insurance tihna tur Project an siam thu leh sawrkar laipuiin cheng nuai 125.05 a rawn sanction tawh thu an sawi a; Mizoram sawrkar-a Budget Allocation an dil mek chu pek an nih hunah sanction dilna an thlen anga, pawisa an hmuh hunah ranvulhtute tan Insurance hi an kalpui dawn thu an sawi a ni.

Mizoram sawrkarin ran insurance kalpui a tum hi Company 6-in an rawn ngaihven thu sawiin AH&Vety Department hotute chuan, Insurance Company hrang hrangte hian Livestock Insurance an kalpui thin dan leh Mizoram-a insurance tha tak kalpui a nih theihna tura ruahmanna an neihte sawrkarah an sawifiah tawh a. Tender chhuah tura Department lamin an buaipui chu an zo tawh a, remchang hmasa berah tender hi an chhuah dawn tih an sawi a ni.

Hetihlai hian Agriculture & Farmers' Welfare Department changtu Minister PC. Vanlalruata chuan kuthnathawktute buh leh bal leh thlai chin Insurance tihsak a nih dawn thu tunhnai khan a lo sawi tawh bawk a, 'Crop insurance' titu tura Tender koh a nih thu leh a chhang hniam ber chu thlan fel a nih thu sawiin, Insurance atana pawisa chawi ngai (premium) chu sawrkarin za zela 90 tum sakin kuthnathawktute'n za zela 10 an tum ve dawn thu a lo sawi tawh a ni. Minister hian Mizoram-ah khuarel chhiatna avanga huan thlai chan te tana chhawmdawlna Crop Insurance Scheme - Pradhan Mantri Fasal Bima Yojana (PMFBY), 2025-26 kalpui tur hian TATA AIG General Insurance Company chu sawrkarin a thawhpui dawn tih sawiin, PMFBY hnuaiah hian Khawkheng, tuilian, thlai hrik leh natna hri, leimin, natural fire, Tek, thlipui leh rial vanga chhiatna te insure theih a nih thu leh a insurance leina man (Premium rate) chu Fur thlai Cereals & Pulses-ah zaa 2 leh Commercial Crop-ah zaa 5 niin Thlasik thlai-ah chuan Cereals & Pulses hi zaa 1.5 leh Commercial hi zaa 5 a nih thu a sawi a ni.