LADC Inthlanpui neih thuai a nih rin a ni

Lai Autonomous District Council (LADC) Inthlanpui neih hun tur chu tihfel la ni lo mah se Inthlanpui hi neih thuai a nih rin a ni.

Lai Autonomous District Council (LADC) Inthlanpui vawi 12-na neih tur atan hian inbuatsaihna kalpui mek a ni a, Mizoram State Election Commission-a hotute chuan nimin khan Lawngtlai tlawhin Election Official te an kawm bakah NGO, Kohhran, MJA, Political Party te an kawm a. DC Conference Hall-a Election Official te a kawmna ah State Election Commission (SEC)-a Commissioner Dr. H. Lalthlangliana chuan inthlanna fel fai, thianghlim leh hlawhtling tak nei turin Election Official-te an pawimawh hle tih a sawi a, mipuiten zalen taka an duhzawng an thlanchhuah theih tura theihtawp chhuah tura chahin, inthlanna tura hmalak tawhna chinah inbuatsaihna a tha hle tih a tarlang a. Tihfel ngai awm ang angte a hma lama tifel tur te, training tha taka pe tur leh Official-te an mawhphurhna tha taka hlen turin a chah nghal bawk.

Inthlan chungchangah NGO, Kohhran, MJA, Political Party-te a kawmna ah SEC chuan Lawngtlai-a an lo kal chhan leh thutkhawm neih a nih chhan ber chu LADC hnuaia MDC inthlanpui lo awm tura inbuatsaihna kalpui chin lo enfiah an nih thu a tarlang a. Mipuiten an duh zawng zalen taka an thlan chu thil pawimawh hmasa a nih thu sawiin, theihtawp chhuah a nih thu a tarlang a. Inthlan ni puan thuai a nih dawn thu tarlangin, party te chu mipuite zalenna tibuai khawpa che lo tur leh thu dik leh dawt tello a inzuar turin a chah a. A bik takin SEC atanga zawm tur thuchhuah ang angte lo zawm sak turin a ngen nghal a. NGO leh Kohhran hruaitute chu inthlanna thianghlim leh zalen a awm theih nana theihtawp chhuahpui tur leh venpui turin a ngen nghal bawk.

He hunah hian State Election Commission Secretary VL. Remliana  chuan thu tawi sawiin, LADC inthlanpui lo awm turah khauh taka dan kenkawh a nih tur thu a tarlang a, 'Model Code of Conduct' tha taka zawm tura Political Party te chu chahin a bik takin inthlanna felfai tak a awm theih nan NGO leh Kohhrante chu thahnem ngai taka SEC thawhpui turin a sawm a ni.

Lai Autonomous District Council inthlanpui neih hnuhnung ber chu December 4, 2020 khan neiin Vote thlak a ni a, December ni 8-ah Vote tla te chhiar a ni a. Hei vang hian Term dinglai hun zo tepin inthlanna pawh hi neih thuai a nih a rinawm a ni.

LADC huamchhungah hian MDC Bial 25 awmin heng bakah hian Nominated Seat 4 a awm bawk a, LADC-ah hian Polling Station  111 (+ 1 Auxiliary PS) awmin, Returning Officer 3, Asst. Returning Officer 3, Sector Officer 17 an awm a. Vote nei mi 95,618 an awm mek a ni.