Ruang phurh nan nuai 150.57 leh ruihhlo ngaite tan nuai 113 sengin damlo 44,546 te Bill pek an ni tawh

Health Minister Lalrinpuii chuan sawrkarin ruang phurhna atan cheng nuai 150.57 a seng tawh tih sawiin, Mizoram Universal Healthcare Scheme hnuaiah damdawi In hrang hrangah damlo mi 44,546 te inenkawlna bill pek sak an ni tawh tih a sawi a, ruihhlo ngaite tan nuai 113 an seng tawh tih a sawi bawk.

Nimin-a ZPM Party in Chhung Inkhawm an neih ah Health Minister Lalrinpuii chuan Pathian leh mipuite zarah Kalphung thar sawrkar chu kum 2 a tling ve ta tep tih sawiin, an hmalakna thenkhat a tarlang a, sawrkarin ruang phurhna atan cheng nuai 150.57 a sen tawh thu leh mi 1445 te ruang chu an Inlum-ah thlensak an ni tawh tih sawiin, “Awlsam zawka Bill thehluh leh pekchhuah a nih theihna turin ICT Department in Apps an siam mek bawk,” a ti. Mizoram Universal Healthcare Scheme (MUHCS) chu mipuiten an chhawr tangkai hle-a a hriat thu pawh Health Minister chuan sawiin, “Tunah chuan mi rethei zawkten an damloh nikhuain Bialtu MLA te, chhungte emaw pawisa puk buai ngai tawh lovin pawisa seng miah lovin an inenkawl ve thei ta a. Tun thlengin damdawi In hrang hrangah damlo mi 44,546 te inenkawlna bill peksak an ni tawh a, sawrkar sum sen zat hi cheng nuai 6604 a tling hial tawh a ni,” tiin phai lamah mi 2637 refer an ni tawh bawk tih a sawi a. Harsatna awm lovin damdawi In te hnenah kartin Bill an la pechhuak thei tih a sawi bawk.

Ruihhlo do chungchanga hmalakna pawh sawiin Minister Lalrinpuii chuan, “Sawrkar chakna ringawt chuan kan thei lo tih hriain NGO hrang hrang leh Kohhran hrang hrangte puihna ngenin anniho nen hian Hulhliap Short Stay kan duang chhuak,” a ti a. Hulhliap Short Stay Programe-ah hian mi 817 vel enkawl an nih tawh thu leh tunah hian Batch 5-na kalpui mekin November 17-ah Batch 6-na kalpui leh tum niin Zu avanga harsatna tawkte thlurbing an ni thung ang tih a sawi a. “Tun thleng hian ruihhlo veite enkawl nan sawrkar in cheng nuai 113 a seng tawh a, Tin, heng ruihhlo bawih atanga chhuak kan thalaite tan hian sawrkar flagship programme – Handholding Policy hnuaiah pawh remruatna siam chhoh mek a ni bawk,” a ti a ni.