Kumin ah Sawhthing quintal nuai thum chuang lei a ni

Kumin hian Mizoram sawrkar chuan Sawh-thing quintals 3,38,354 leiin Sawhthing leina man cheng vbc. 118. 89 pekchhuah a ni tawh a, la pek loh vbc. 20 vel ala awm.

Mizoram Agricultural Marketing Board te chu nimin khan an Chairman leh Chief Minister Lalduhoma hovin CM Conference Hall-ah an thukhawm a, he hunah hian kumin a thlai thar lei dan thlirlet niin he huna tarlan a nih danin kumin ah Sawhthing quintals 3,38,354 lei a ni a, a man pekchhuah tawh chu cheng vbc. 118. 89 niin la pekchhuah loh cheng vbc. 20 vel a la awm a. Sawrkarin Sawhthing a lei zingah LPK Trip 7 chiah hralh ral lohvin a awm a. Hetianga a awm chhan hi a chhe tur ven nana thliar (grading) a ngaih vang niin hei pawh hi leitha siam nana lei diltu an awm mek a. A dang zawng chu mumal taka tihral vek a ni.

Sawhthing lei leh hralh thu-a thil fel lo a awm leh awm loh chhuitu Investigation Team ten Champhai District an chhuichianna report he hunah hian pek a ni a, thil dik lo an hmuhchhuahte hi sawrkarin a taka sum a la pekchhuah loh te an ni a. Hetiang harsatna hi a awm tawh loh nan ruahmanna siam a ni bawk a. Kumin a Sawhthing lei leh hralhna bikah hian Central Sawrkar Market Intervention Scheme atangin cheng vbc. 9 vel hmuhlet beisei a ni. He hunah hian kumthar atana inbuatsaihna bakah NITI Aayog-in Sawh-thing chungchang sawihona a buatsaih tura tel tur an ruat a, Buyer Seller - Meet 2025 neih dan tur te, MAMB thuam chak dan tur leh thil dangte an sawi bawk.