YMA in kawng siam mek a hmunah an enfiah leh

Central YMA hruaitute chuan Inrinni khan Vairengte leh Sairang inkar kawng siam mek leh Hlimen leh Lungleng inkar kawng siam mek te chu a hmunah tlawhin an enfiah.

Central YMA in Vairengte leh Sairang inkar kawng an enfiahna ah hian an Vice President, Prof. Lalnuntluanga hovin hruaitu engemaw zat an kal a, NHIDCL hnuaiah Short Term Maintenance Contract (SMTC)-in Vairengte atanga Sairang inkar hi Contractor pathum in Open Tender-a chhangin kumin July thla atanga thawk tanin July 2026 a thawh zawh tur a ni a. Tun thleng hian Contractor-te hian an thawh tur ang zat ve pawh an la thawk lo vek nia an hmuh thu Central YMA hruaitute chuan sawiin, NHIDCL hotute leh Contractor te chu nakum Fur ruahtui tlak hma ngeia an hna zo vek tura hrilhin, an vil zui zel tur thu an hrilh a ni.

Central YMA hruaitute chuan thla hmasa ni 8-a an kal ai chuan hna pawh an lo thawk ve viau-a an hriat thu an sawi a. Hei aia nasa lehzuala chaka hna thawk turin Contractor te hi an hrilh a. Vawiin hian Sairang lam atanga hna thawk tan ve nghal turin Jain Infratech Co. hotute chu an hrilh bawk a ni. 

Hlimen leh Lungleng inkar kawng siam an enfiahnaah hian an President R. Lalngheta hovin hruaitu dangte an kal a. PMGSY hnuaia helai kawng siam hnathawk mektu Contractor te hian hna an thawk muang nia hriat a nih avangin Central YMA te hian an en a, Contractor te chu chak zawk a thawk turin an ngen a. Central YMA President chuan YMA chu thil tha duh, chak tak leh tha tak ni bawk si a thawh duh an nih thu sawiin, helai hmuna thawkte pawh Mizo tho an nih anga Mizoram tana theihtawp chhuah tura an duh thu a sawi a. Kawng enfiahnaah hian Samtlang, Lungleng North leh Lungleng-I Branch hruaituten an lo tawiawm a ni.