KMMTTP Impact of the Study Group in ramri tlawh

KMMTTP Impact of the Study Group Committee Chairman T. Lalhlimpuia MLA chuan Inrinni, Dec. 6, 2025 khan Myanmar leh India inrina Zochachhuah leh Hmawngbuchhuah khua bakah a chhehvel khua te a tlawh.

Sawrkar laipui hmalakna kal mek Kaladane Multi-Modal Transit Transport Project (KMMTTP) hmalakna kal meka Mizoram leh Mizo mipuite a a nghawng awm thei tur thil hrang hrangte thlithlai leh zirchiang in KMMTTP Impact of the Study Group Committee-a Chairman hian ramri hnaiha khua te hi tlawhin Lawngtlai East Bialtu MLA Dr. Lorrain Lalpekliana Chinzah leh Lunglei Municipal Council-a Executive Councillor H Zorinsanga bakah Lawngtlai Division PWD SE, Er. Lalramhluna leh Mizoram State Planning Board Member Zomuana ten an tawiawm a, Act East Policy hnuaia KMMTTP hmalakna kalpui mek hi Central Sawrkar chuan Mizoram chhung atanga chhimlam Mizoram tawp, Zochachhuah thlengin kawngpui sial hna chu thawh zawh a ni tawh a, hetihlai hian Zochachhuah (Mizoram) atanga Myanmar ramchhung Paletwa thlenga kawngpui sial tur chu tun dinhmunah hian kalpui mek zel a ni a, Sawrkar laipui thuneitute chuan he hna thawh mek hi kum 2027-ah chuan zofel turin an ruahman nia hriat a ni.

He Look East Policy avanga hmasawnna hna kalpui mek hian a chhe zawng leh a tuartu lamah Mizoram hi a siam theih avangin Mizoram Sawrkar chuan nghawng tha lo kawng hrang hrang thleng lova, hmasawnna leh changkanna zawk kan neih theihna turin inbuatsaihna leh hmalakna a kalpui zel a, Study Group chuan hemi chungchang zirchianna hi an neih mek bakah Mizoram mipuite chu inbuatsaihna tha nei a, he hmasawnna lo awm tur hi a hlawk zawng leh a tha zawnga chhawrtu an nih theihna turin tanlakna tur hrang hrang zirtirin kawhhmuhna a kalpui mek a ni.

Mizoram chhim tawp Myanmar ramri Zochachhuah khua a cheng khawtlang hruaitute sawi danin KMMTTP avanga Bangladesh mi dan lova lo lut an awm rihloh thu leh Myanmar atang erawhin raltlan erawh an khua ah hian In 40 vel an awm thu an sawi a, KMMTTP avanga hmasawnna hi Myanmar lam chu a teltu ah an tang hmasa mek a, mamawh hrang hrang Mizoram atangin an chawlut mek zel niin an sawi a, Mizoram lam chuan Myanmar lam atanga chawkluh an la nei meuh lo niin an sawi bawk.

India ram chin Zochachhuah atanga Myanmar ramchhung Paletwa thleng kawng sial thui zawng hi KM 126 vel a ni a, IRCON Company chuan hna thawk mekin Zochachhuah-ah hian Primary School pakhat leh UPS pakhat awm a awm mek a, chenna In 162 awmin Mizoram Chhim tawp thlenga Rel kawng sial tumna Hmawngbuchhuah khua pawh an tlawh nghal a ni.