NCC Academy dinna tur ram ruahman fel tawh

National Cadet Corps (NCC) GP HQ Aizawl Group Commander Brig. GS Arora chuan Mizoram sawrkarin NCC Academy changtlung tak dinna turin ram a ruahman fel tawh tih a sawi.

1 Mizo Air Squadron NCC-in kumtin-a a buatsaih thin, Combined Annual Training Camp (CATC-132) chu Inrinni khan Tanhril-a State Training Centre-ah neih tan niin he Training Camp hawnna ah hian Group Commander chuan he Academy din tur hi NCC training na hmun changtlung tak tur, tunlai thiamna hmanraw changkang ber bera thuam tur a nih thu a sawi a. Hei hi hmarchhak pum tana ‘Centre of Excellence’ tur, Academy pawimawh tak a nih dawn thu a sawi a ni. 

Group Commander chuan NCC chu a hminga pawl ding ve mai ni lovin khawvela thalai intelkhawm pawl lian ber a nih thu leh thalai tam tak nun kaihruaitu, ram hmangaihna thinlung pu tura thalaite rilru kaihruaitu pawimawh tak a nih thu a sawi a. NCC chu hnam hrang leh nunphung hrang hrang nei thalaite suihkhawmtu pawimawh tak a nih thu a sawi a. Tunhnaiah Mizoram sawrkar leh North East Region NCC Directorate tangkawpin Mizorama NCC dinhmun tha zawka a thuam thu a sawi bawk a ni.

Tun dinhmunah Mizoram hian Army NCC Battalion pathum leh Air Force NCC Squadron pakhat a nei a, anni hian a huhovin kumtin Cadet 8,000 vel an zirtir thin a ni.