World AIDS Day 2025 chu Serchhip-ah District Bawrhsap hovin hman a ni

Khawvel puma HIV-AIDS natna dona leh he natna chungchang inzirtirna ni ‘World AIDS Day 2025’ chu nimin khan hmun hrang hrangah hman niin Serchhip-ah pawh District Bawrhsap Paul L. Khuma hovin Serchhip Bazar Tual-ah he ni pual hian hun hman a ni.
Serchhip District AIDS Prevention & Control Committe leh Mizoram State AIDS Control Society (MSACS) tangkawp buatsaiha World AIDS Day 2025 puala hun hman ah hian Bawrhsap Paul L. Khuma chuan Serchhip District-a HIV/AIDS dona kawnga thawktute hmalakna chu engemaw chen a hriatpui ve thu leh nasa takin hna an thawk nia a hriat thu sawiin, an hmalakna chu lawmawm a tih thu a sawi a. HIV chu kum 1981-ah khawvel in a hmelhriat thu leh tihdamna a awm loh avangin he natna kai te chuan an thihpui ngei tura ngaih a nih thin thu a sawi a. Amaherawh chu khawvel thiamna sang zelah tunah chuan he hri kai te pawh natna benvawn nei anga aupui a nih tawh thu leh he hri kai thihpui pawh nasa taka an tlakhniam tawh thu a sawi bawk.

Serchhip Bawrhsap chuan HIV/AIDS chu chhan hrang hrang avanga inkaichhawn theih a nih thu sawiin, a vei te pawh endawng mai lova he hri inkaichhawng lo tura kan fimkhur erawh a pawimawh thu a sawi a. Chumi tur chuan nupui pasal kan kawppui te laka rinawm te, Pathian thu nena kan nun kan hman leh Drug hmansualna ah kan inhnamhnawih loh a tul thu a sawi a. He huna kalkhawm zirlaite leh thalaite pawh HIV/AIDS inkaichhawnna langsar mipat hmeichhiatna hman khawlohna leh ruihhlo hmansual kawngah fimkhur tura chahin, kan hma lawka hunpui lo thleng tur pawh heng thil te tihchhinna hun atana hmang lo turin a chah bawk a. Kan nun kawng-ah harsatna leh beidawnna kan lo tawk palh a nih pawhin beidawng mai lova Pathian kan hnaih theihna tura amah kan belh tlat a pawimawh zia kan hriat reng a tul thu a sawi bawk.

Serchhip-a World AIDS Day puala hun hman ah hian District Hospital Serchhip-a ICTC Counselor Lalnuntluangi Renthlei chuan kumin a World AIDS Day Thupui, ‘Overcoming disruption, transforming the AIDS response’ (Harsatna kara AIDS hmachhawn dan thar) tih hmangin thu a sawi a, Pastor K. Ramdinthara chuan Hunserh hmangin Dr. R. Lalrinmawia, Medical Officer, OSTC chuan lawmthu sawiin hun a khar a ni.

Serchhip-a World AIDS Day 2025 puala hun hman ah hian Serchhip-a zirlai naupangte leh tlawmngai pawl te bakah District AIDS Prevention & Control Committee-a Member te leh Health Department-a thawktute an tel a ni.