Bana Kaih kalpuitu zaa 90 in an thawktha ah ngai

Mizoram sawrkar Flagship programme Bána Kaih (Handholding) Scheme kalpui tawh zinga endik tawh chinah zaa 90 chuan hna an thawk tha tawk nia ngaih a ni.

Mizoram State Policy Coordination Committee chu niminpiah khan an Chairman leh Chief Minister Lalduhoma hova CM Conference Hall-ah thukhawmin an hmalakna hrang hrangte an thlir a, he hunah hian Chief Minister Lalduhoma chuan Handholding chu sawrkar flagship programme a nih thu sawi nawn lehin, Department te chu an nitin hnathawh naa Flagship Scheme thilte lo ngaihpawimawh hmasa zel thin turin a chah nawn bawk a ni.

He thutkhawm ah hian AH&Vety, Horticulture, Fisheries, I&PR, LRS&WC leh Sericulture atangte in Monitoring Report dawn tawh a nih thu tarlan niin an endik tawh china zaa 90 (%) vel te chu thawk tha tawka ngaih an ni a. Hmabak leh hmachhawp hrang hrang sawiho a ni bawk. DDK Aizawl-in sawrkar Flagship Programme-a thawhho an rawtna chu ngaihthlak niin, an rawtna zirchiangtu tur Team an din nghal a, a rang lama thutlukna siam a ni anga. Handholding hnuaiah thawhpui Bank tam zawk an awm theih nan hmalak relin, a rang lama bawhzui tur a ni bawk ang.

Cooperation Department-in Handholding hnuaia pawlin a dil theih loan dilna an thehluh project 18 te thlirin, Committee hian an project an ngaihpawimawh dan indawt siam hmasa turin Cooperation Department hi chahin a tul anga bawhzui tur a ni a. Animal Insurance Scheme (Livestock Insurance Scheme) hmalakna ngaihthlak niin, a thawhkhat nan ran 3300 vel huama kalpui phawt a ni ang. Tunah hian AH & Vety hnuaiah Progress Partner mi 1010 an awm mek a, a tam zawk hian Vawk vulh an thlang a ni. Animal Insurance hi National Livestock Mission hnuaia kalpui tur a nih angin a Guidelines ang chuan Central leh State sawrkar tum tur bakah beneficiary contribution a tel ve thin a. Handholding Progress Partner ten insurance an tihna tura an tum ve tur chu Handholding atanga tumsak nise an ti bawk.

Thawhpui Bank-te atangin Loan Component hnuaia loan dawng tura rawt tawh vawiin thlenga la dawng si lo te dawn loh chhan ngaihthlak a ni a. Loan hi pek tawh 287, bawhzui mek (pending) 280 leh en that leh tura Bank ten an thawnkir (returned) 113 an awm a ni.

Handholding thawh hnihna atan Loan Component-a diltu mi 330 an awm leh mek tih he hunah hian tarlana  ni bawk a, nghakkhawm lova endik nghal zel tur an nih avangin Line Department te chu che rang tura chah an ni a. A thawh hnihnaah vek hian CM Special Package diltute dilna 570 chu endik tura thlan an ni tawh a, a diltu leh endik tura thlan zat hi nitin a danglam ve reng a. Dilna hun hi a hrana hawn a ni tawh lova, engtiklai pawha thehluh theih a ni.