Thingtam Sazu puang tuartute tanpuina pek theih an ni

Kumin-a Thingtam lo thlengah Mizoram District 11-a kuthna-thawktu chhungkua 5,317-te buh leh bal leh thlai thar tur beisei atanga za zela 42.06 chu Sazu puangin an seh chhiatsak a; Mizoram sawrkara Disaster Management & Rehabilitation Department hnenah Agriculture & Farmers Welfare Department chuan Thingtam vanga Sazu puang hi State Specific Disaster-ah puang turin an ngen a, amaherawh chu State Specific Disaster a puan kher ngai lovin State Disaster Respond Fund hnuaia norms awmsa atangin Sazu puang tuartu loneitute hnenah tanpuina pek a ni dawn a ni.

Disaster Management & Rehabilitation Department hotute hnen atanga Akashvani News, Aizawl thudawn danin, Rawthing tamin a hrin Sazu puang vanga loneitute harsatna tawh hi Agriculture Department chuan State Specific Disaster a puang turin an ngen a, Amaherawhchu Sazu puangin loneitute buh leh thlai a khawihchhiat vanga tanpuina pek tur hi State Specific Disaster-a puan kher ngai lovin SDRF Norms-a ‘Pest Attack’ hnuaiah tanpuina hi pek theih a nih thu an sawi a; Sazu puang tuartu loneitute hi DC-ah an report a, verification tih a nih chuan pek theih sa a nih thu leh hmalak zel dan tur chu sawrkar hotuten an ruahman dawn thu an sawi a ni.