Kumin ah Chhiah cheng nuai 86,523 hmu tawh

Sawrkar kum kal mekah April atanga November, thla 8 chhungin Taxation Department chuan kawng hrang hrang atangin Chhiah cheng nuai 86,523 a hmu tawh a; thla liamta November khan cheng nuai 7,909 a hmu a ni.

Taxation Department-in Mizorama chhiah hmuh zat (monthly/annual achievement)-a tarlan danin, kumin April - November thla chhung khan kawng hrang hrang atangin chhiah cheng 86,523 hmuh a ni a; Goods & Sevices Tax (GST) atangin cheng nuai 7,279 hmuh niin, chhiah hmuhna tam ber a ni a, GST atanga chhiah hmuh hi Taxation Department-in chhiah a hmuh zawng zawng atangin za zela 90.3 a tling a ni. November thla ah hian GST dawta chhiah hmuh tamna ber chu Sales Tax niin cheng nuai 325 hmuh a ni a, a dawttu Profession Tax atangin cheng nuai 117 hmuh a ni bawk. Heng bakah hian Petrol leh Diesel atanga sawrkarin chhiah chi hnih a lakna, Road Maintenance Cess leh Social Infrastructure & Services Cess atangin cheng nuai 93 ve ve hmuh a nih bakah Entertainment Tax atangin Rs 10,000 hmuh a ni bawk.

Sawrkar kum kal meka thla 8 chhung hian GST atangin cheng nuai 61,599 hmuh ni tawhin a tam ber a; Sales Tax atangin cheng nuai 16,962, Profession Tax atangin cheng nuai 1,313, Road Maintenance Cess leh Social Infrastructure & Services Cess atangin cheng nuai 3,323 ve ve bakah Entertainment Tax atangin Rs 50,000 hmuh a ni tawh a ni.