Ruihhlo ngai pual Camping neih dan tur ruahman a ni

Nakum kumtir lama Serchhip District-a ruih-hlo ngaite puala Gospel Camping neih dan tur ngaihtuahin nimin khan Serchhip-ah Bawrhsap Paul L. Khuma hovin thutkhawm neih a ni.
Serchhip DC Pisapui Hall-a thutkhawm neih ah hian District Bawrhsap Paul L. Khuma chuan Nasha Mukt Bharat Abhiyan (NMBA) Drug Free India Campaign hmalakna kaltlangin pawl hrang hrangte thurawn an dil thu leh chumi-a rawtna lo piang pawimawh ber te zinga mi chu ‘Ruihhlo Ngaite Pual Camping’ a nih thu a sawi a. Chhungkaw tam tak min nghawngtu, ruihhlo dona hmanraw pawimawh ber zinga mi a nih avangin thahnemngai taka hma la turin a sawm a; an theih anga tam tawngtainaa hlan turin a ngen bawk a ni.

He thutkhawm hi Organising Committee Vice Chairman Upa R Sanghmingthanga chuan kaihruaiin thu ngaihtuah tur chi ruk (6) chhawpchhuah niin he Gospel Camping neih hun atan kumthar February thla bawr vel tinzawn a ni a, Speaker atan Bethel Ministry atangin Frederick Lalrindika chu sawm a ni ang. Camping neihna hmun atan hmun hrang hrang enfiah a nih hnuah Serchhip Vengchung-a Thankunga Camping Centre chu beisei a ni a. Camping hi ruihhlo ngaite pual a nih dawn avangin mipui mimir tan hawn a ni dawn lo a. Camping hi chhawng hnih (2) buat-saih tum niin chhawng khatna leh chhawng hnihna hi kar hnih (2) ve ve neih tura ruahman a ni bawk.

He Gospel Camping buaipuitu tur hian Camping Director leh Deputy Director ruat an ni dawn a. Sub-Committee peng hrang hrang 7 - Refreshment, Traffic & Security, Light & Sound, Information & Reception, Camping Follow Up, Water & Sanitation leh Medical te din tura rel a ni bawk a. Serchhip District chhung Kohhran tinte hnenah ngenna pe chhuakin, tawngtai rual thupui-ah thawh thin nise an ti a. Mahni mimal fianrial tawngtainaah a tam thei ang ber hlan turin Serchhip District mipuite an sawm bawk a ni.