Khawvel puma rualbanlo te ni pualin Serchhip-ah Bawrhsap hovin hun hman a ni
International Day for persons with Disabilities ah hian Bawrhsap Paul L. Khuma chuan mihringte hi Pathian in a anpui-a a siam te kan nih thu leh kan hlut thu sawiin, rualbanlo te ni a lo thlen hian rualban lohna nei te enkawltu nu leh pa te leh an chhungte pawhin hetiang mi enkawl tura Pathian in mawhphurhna an pek hi a pawimawh zia an hriat thar a pawimawh thu a sawi a. Serchhip in rualbanlote enkawlna leh an inzirna School tha tak a nei pawh lawmawm a tih thu sawiin, School enkawltute leh thawktute inpekna chu ropui a tih thu a sawi a. Vohbik te chu kan khawtlang nunhona ah enhrang bik lovin an ban-ah kan kaih zel a pawimawh thu leh harsatna an neih pawha kan tanpui zel a pawimawh tih kan hriat reng a tul thu a sawi bawk.
He hunah hian Shalom Special School, Serchhip-a Zirtirtu A. Lalawmpuii chuan an School lo indin chhoh dan sawiin, Serchhip chu District mal-a Rualbanlote tana School nei hmasa ber niin August 17, 2005 khan mi In luaha lo din tan a nih thu leh tuna an School, New Serchhip Venglai a mi chu April 11, 2011-ah an neih tak thu a sawi a. Kum 2011 atangin Serchhip-ah Rualbanlote ni hi an lo hman tan thu leh kumin ah District thuneitute ruahmanna hnuaia an hmang thei chu an lawm hle tih a sawi bawk.
Nimin-a he hun hman hi Serchhip SDO (Sadar) Rebecca Laldinmawii Hrahsel chuan kaihruaiin kum 1992 atangin December 3 chu UN in a rel angin ‘International Day for persons with Disabilities’ atan hman a nih thu a sawi a, he ni hi rualbanlo ten an dikna leh chanvo an hriat theihna tur atan leh an dinhmun chawikanga khaw-tlang ah tlangnel taka an tel theihna tura inzirtirna atan te hman thin a nih thu a sawi bawk. He hunah hian Shalom Special School-a zirlaite hnenah Bawrhsap hian thilpek a hlan bawk a ni.
.jfif)
Comments
Post a Comment
I ngaihdan i sawi hian mipui ngaihdan i tarlang a ni!