Pipu sulhnu haichhuah thawh hnihna kalpui tan

Tunlai thiamna hmanga pipu sulhnu hlui haichhuah hna, Archaeological Excavation Thawhhnihna (Phase-2) chu niminpiah khan Khawbung BDO Lalchhandami Pachuau chuan Champhai District-a Dungtlang hmunhlui-ah a hawng.

He hunah hian Khawbung BDO Lalchhandami Pachuau chuan, pi leh pute sulhnu, Mizo Archaeologist thiam tak tak ten an haichhuak chho mek chu Tuipuiral tlangdunga pipu sulhnu chanchin zirchianna atan a hlu hle dawn tih a sawi a. Pi leh pu te chanchin hi thua inhlan-chhawn (oral tradition) ringawt chuan tunlai zirmite tuihalna a phuhru pha tak tak lo nia sawiin, hetianga hmalak a nih theihna atan ngaihtuahna, tha leh zung tam tak sengtu te chu fakawm a tih thu a sawi bawk.

Tuna Dungtlang hmun hluia pipu sulhnu hlui zirchianna (Archaeological Excavation at Dungtlang old Settlement site, Champhai District) hi North Eastern Council, Shillong atanga sum hmuh niin Art & Culture Department leh Higher & Technical Institute of Mizoram ten an buaipui a. Hmalatu zinga mi Dr. Lalhminghlua chuan, nikum Thal laia an laih tawh atanga a lan danin Dungtlang hmun hluiah hian hun bi hrang hrana mihring lo chen tawhna chhawng thum (three layers) a awm nia sawiin, hunbi hre turin Sample an la la kim lo niin a sawi bawk.