KVK Kolasib-in Alu chi semchhuahna hun an hmang

Nimin khan KVK Kolasib chuan kuthnathawktute hnenah Alu chi an semchhuak a, he hun hi Agriculture Minister PC. Vanlalruata chuan khuallian niin a hmanpui a ni.

Agriculture Minister hian SASCE (2022-2023) sum hmang a sak Plant Health Clinic chu hawngin hemi hnu hian Alu chi semchhuahna hun hi hman leh a ni a, he hun hi Kolasib KVK-a Senior Scientist & Head Dr. Michelle C. Lallawmkimi chuan kaihruaiin Dr. Carolyn Zothansiami chuan Technical report a pe a. KVK Kolasib hmalakna in kuthnathawktute hnenah hian Alu chi quintal 96 semchhuah a ni tawh a, Variety 10 enchhin tawh niin Kolasib District chhun a khaw 11 an tuam tawh thu a sawi a, KVK ten Alu chi an semchhuah hi Indian Agricultural Research Insitute, New Delhi, te hnen atanga hmuh a ni.

He hunah hian Agriculture Minister PC. Vanlalruata chuan Kut-hnathawktute chuan hlawhtlinna chang ngei tura hna an thawh a tul thu sawiin, a thlawn a thil sem ringawt a lungawi lovin, mithiam rawn chunga ti leh zel tur leh Model ni turin kalkhawm te chu a fuih a. Kolasib, Mamit leh Lawngtlai te chu Agriculture kaihhnawiha potential nei tha em em District te an nih thu sawiin, amaherawh chu heng District-ah te hian Sawhthing erawh a that theih loh thu sawiin, heng te hi mithiamten zirchianna nei se a duhthu a sawi bawk.

Nimin-a he hun hman ah hian khual zahawm, Department of Agriculture and Farmers Welfare Director R. Lalnunzira chuan Thingdawl a Agriculture Farm-ah Alu chi siamchuah theih tawh dawn thu sawiin, hei bakah hian a vawnthatna tur Cold Storage pawh hawn a nih dawn thu a sawi tel bawk.