Online Border Check Post Module hman tan a ni ta

Mizoram-ah ‘Online Border Check Post Module’ chu hman tan a ni dawn ta a, nimin khan Transport Director Er. R Lalrammawia hovin hemi pual hian hun hman a ni.

Transport Directorate Conference Hall-a he hun hman ah hian Transports Director chuan Mizoram Transport Department chuan mipuite tana zangkhai, dik leh awlsam zawka Entry Tax lak a nih theihna turin theihtawp chhuahin hmalak a nih thu leh NIC nen tangkawpin tunah hian Online Border Check Post Module hman theih tura peihfel a lo nih tak thu a sawi a. “Sawrkarin a tul angin thawktute min pek belh a, hmanraw leina tur sumte min pe bawk a, Transport Department leh NIC tangkawp chuan lirthei te tlan vel awlsam zawk nan Border Check Post Module chu 1st December 2025 atang chuan Live server-ah a deploy ta a ni,”a ti. He hmalakna hian lirthei hmanga zin veivak mipuite leh sumdawng lirthei State dang atanga lo lut te tan awlsamna a thlen an beisei thu sawiin, Mizoram State-in State changkang zawkte tihdan anga he Module kan hmang thei tur chu lawmawm a tih thu a sawi bawk.

State dang atanga Mizoram-a lirthei (Commercial Vehicle) lo lutte hian kan State-a an rawn luh hian Entry Tax an chawi a ngai a, chu Entry Tax chu Enforcement Check Gate-a duty ten Manual Receipt hmangin an lo la thin a, chu chu Mizoram sawrkar chhiah-ah chhunluh a ni leh thin a. Border Check Post Module hi Computer hmanga Common portal kaltlanga online-a awlsam leh dik taka Entry Tax lakna tur a ni.

Mizoram-ah hian he Border Check Post Module hmanna tur hi hmun hnih – Vairengte leh Kanhmun Enforcement Check Gate te a ni dawn a. Heng hmunah hian State dang lirthei (Commercial Vehicle) lo lut reng rengte chu awlsam takin Entry Tax an lo la zel tawh dawn a ni.