Mizoram dapchhuaka thalaite talent haichhuahna tur ‘Empowering Mizoram Sports’ tlangzarh a ni ta

Mizoram State Sports Council (MSSC) huaihawtin Sports lama inkaihhruaina mumal zawk a awm theihna tur leh Mizoram pum dapchhuaka thalaite talent haichhuahna tura sawrkar hmalakna ‘Empowering Mizoram Sports’ chu nimin khan a tlangzarhna hun hman a ni.

Nimin-a ‘Empowering Mizoram Sports’ tlangzarhna hun hi Ramhlun Indoor Stadium, Conference Hall-ah neih niin he hun hmanpuitu Home Minister K. Sapdanga chuan Empowering Mizoram Sports (EMS) chu Mizoram tan infiamna lama bungthar pawimawh tak a nih thu a sawi a, Sport lama khawvel hriata Mizote kan inphochhuah theihna tura hmalakna pawimawh tak a nih thu sawiin, kum 2036-a Olympic Games lo awm tur atana inbuatsaihna tur a nih thu te, thalaite ruihhlo leh ngawlveina hrang hrang lak atanga chhanchhuahna tur peng pawimawh tak pakhat a nih tur thu a sawi a; awmze nei lehzuala training kalpuina tura duan inkaihhruaina, Training Manual pawh a tlangzarh nghal bawk a ni.

Empowering Mizoram Sports Programme hnuaiah hian Mizoram hmun hrang hrangah kum 8 - 15 inkarte Basic Coaching pek an ni dawn a, Coaching hi ni 15 chhung atan ni tin darkar 3, a vaiin darkar 45 pek an ni dawn a ni. Kum 8-15 inkar Target an nih chhan hi kum 2036-a taksa leh rilru that vanglai thleng tur 'Age Group' an nih vang a ni a. Mizote thiam zawng, kum 2036 Olympic Games-a India ram aiawha an tel ve theihna tur nia ngaih Sports discipline hrang hrang 24-te thlan niin Category 3-ah then a ni bawk. Category A-ah Archery, Badminton, Boxing, Hockey, Judo, Taekwondo, Weightlifting leh Wrestling te awmin Category B-ah Athletics, Basketball, Football, Karate, Shooting, Table Tennis, Volleyball, Wushu leh Tennis a awm a. Category C-ah Cricket, Cycling, Fencing, Kickboxing Muaythai, Sepaktakraw leh Swimming te a awm bawk.

Ruahman dan chuan a bultan nan Category A hnuaia Sports discipline-te hi kalpui phawt tur a ni anga, a tul dan leh Fund awmzel dan azirin Category B leh C hnuaia discipline chu telh chhoh tur a ni a, Public-Private-Partnership (PPP) Mode-a kalpui tur a ni a. Sawrkarin Coach leh Sports equipment a tum ang. Coach duh Khua/Veng te'n dilna an thehlut anga, a remchan dan ang zelin tumah duhsak bik awm lovin Coach te tirhchhuah thìn an ni dawn a. Coach diltu khawtlang in Coach-te veivahna (sumo fare), thlenna leh Coaching an pek chhunga an ei leh in an tum ve anga. Hei hi khawtlangin neitu nihna rilru pu-a theihtawp an lo chhuah ve theih nana ruahman a ni.

EMS hi Phase Wise-a kalpui tur a ni dawn a, Phase-1 ah Grassroots Coaching/Talent Identification chu ni 15 chhung training kalpui a ni anga, Phase 2-ah Phase 1-a training neite tan District leh State Level inelna buatsaih tur a ni ang. Phase 3-ah chuan Phase hmasa pahnih atanga infiammi thlan bikte Residential Mode-a Coaching/Training neihpui tura ruahman niin an tih that dan azirin uluk lehzuala enkawl chhunzawm zel an ni ang.

Empowering Mizoram Sports kalpuina'n 'The Mizoram Bana Kaih (Hand holding) Scheme' hnuaia 'Participative Planning and Innovations for Sustainable Development' component atangin Rs. 2,50,00,000/- dah chu sanction a ni tawh bawk.

EMS hnuaiah hian Mizo infiammi Olympic-a tel thei tura talent leh thiamna nei bikte chu scholarship hmanga chhawmdawlna pek tum a ni a, EMS tha taka kalpui a nih theih nan Consultancy Firm, Angels Business Promoter-te nen thawk ho turin ruahmanna siam niin EMS hi Documentation, Data, Grading System, Feedback pekna mumal tak nen kalpui tur a ni dawn a ni.

EMS-ah hian Coaching petu tur chu State-Level Sports Association-te nen tang-kawpin October thla khan Trainer 73 thlanfel an lo ni tawh a, nimin khan ni 5 awh tur ‘Trainers Training’ pawh neih tan nghal a ni bawk.