Mizoram State University Campus dah turin ngen

Champhai NGO Coordination Commiittee chuan Champhai hmuna Mizoram State University Eastern Campus dah a nih theih nan a hma la tura Chief Minister ngenin, Mamit Thalai Pawl te pawhin Mamit District tana State University Western Campus din sak ngei turin Higher & Technical Education Minister hnenah an ngen bawk.

Kar kalta Nilaini-a Chief Minister hnena lehkha an thehluhah Champhai NGO Coordination Committee chuan Champhai chu Mizoram khaw lian ber pathumna ni mekin khawchhak lam nen insumdawntawnna hmunpui a nih thu leh Border Trade-ah pawh sawrkar laipuiin a ngaihpawimawh khua a nih thu an tarlang a. Govt. Champhai College pawh Mizoram-a College hlun leh upa pawl, Mizoram State College-a upa ber dawttu, kum 1971-a din a nih mai bakah khawchhak lamah chuan College changtlung leh Campus nei tha ber tia chhal theih hial a nih thu an sawi a. Mizoram State University a lo din dawn takah chuan Govt. Champhai College chu tichangtlungin Eastern Campus dinna remchang tak a nih mai bakah mamawh a ni tel hial zawk tih an tarlang a. India sawrkarin Look East Policy atanga Act East Policy a kalpui atangin khawchhak lam nen inlaichinna tha zawk Act East Policy behchhanin khawchhak lam nena insumdawn-tawn nan thil pawimawh tak Centre for International Business chu a din theih dawn bawk tih tarlangin, hei hi College Under-Graduate Course BBA te nen siamrem awlsam leh tha tak tur a nih thu an sawi a ni.

Champhai NGO Coordination Committee hian kumin February ni 19 khan Mizoram Sawrkarin Mizoram State University a din thar tur chu Champhai-ah dah turin Chief Minister hi an lo ngen tawh a. Tunhnaiah Mizoram State University chu Lunglei-ah dah tum a nih thu Chief Minister in a puan avangin Mizoram State University Eastern Campus chu Champhai-a dah turin an ngen a ni.

Hetihlai hian Mamit District Thalai Pawl te chuan Zirtawpni khan Higher & Technical Education Minister, Dr. Vanlalthlana hmuin State University din turah Mamit District tan State University Western Campus din sak ngei turin an ngen a. Mamit District Thalai Pawl te hian tunhnaia State University dinna tur The Mizoram State University Act, 2025 chu a tul anga siamthat a nih tur thu Chief Minister in a sawi thu sawiin, State University Act tih danglam a nih dawn takah chuan Mizoram-a Aspirational District awmchhun, zirna ah pawh nasa taka dawmkân ngai Mamit District tan State University Western Campus din a, Pro Vice Chancellor enkawlna hnuaiah State University School pakhat tal din ve a nih theih ngei nana hmalakpui turin Minister chu an ngen a, he State University Act siam that turah pawh hei hi hre renga a tul anga theihtawp chhuahpui turin Minister an ngen a ni.