CM hnenah Scouts & Guides chawimawina hlan

Chief Minister Lalduhoma chu Bharat Scouts & Guides chawimawina sang ber, Silver Elephant Award hlan a ni.

Uttar Pradesh State khawpui, Lucknow-ah Zirtawpni khan Bharat Scout & Guides kum 60-na lawmna leh 19th National Jamboree neih niin he hunah hian India President Droupadi Murmu chuan Chief Minister Lalduhoma hnenah Bharat Scout & Guides chawimawina sang ber ‘Silver Elephant Award’ hi a hlan a, he Chawimawina lehkhaah hian Chief Minister Lalduhoma hnena he chawimawina an pek chhan chu Bharat Scouts & Guides hmalaknaa a thawh that chungchuan vang (Most Exceptional Service) a nih thu a inziak a ni.

He chawimawina hi Mizo pasarih-in an lo dawng tawh nia hriat a ni a. A dawng hmasa ber chu Hrangthanga (L) niin kum 2000 khan a dawng a, Chief Minister Lalduhoma hmaa a dawngtu hnuhnung ber chu Lalrosangi niin kum 2017 khan a dawng a ni.

Chief Minister Lalduhoma chuan lawmthu sawiin, “Mizoram mipui, khua leh tui tha, ram leh khawtlang tana inpe zo em em, midangte nena thawhho thiam, mahni inphata midangte tanpui tura inpeih reng thinte vangin he chawimawina hi min pe niin ka hria a. Keima mimal hlawhtlinna ah ka ngai lova, Mizoram mipuite hlawhchhuah zawk a ni,” a ti a. Mizoram-a Bharat Scout & Guides hotute leh Sports & Youth Services Department te thawhrimnaah lawmthu a sawi bawk.

ZPM Party chuan Chief Minister Lalduhoma chu chawimawina a dawnah an lawmpui thu thuchhuah siama tarlangin, “Hun rei tak ram leh hnam tana tha a lo thawh tawhna te, vawi engemaw zat MLA ni chunga ram rawng a lo bawl tawhna te, kum hnih chauh Chief Minister a la ni chhunga a hnathawh te avang hian chhuanawm kan ti a. Heng a hnathawhte hi khawvel leh India State dangte pawhin an la hre dawn chauh a ni,” an ti bawk.