Progress Partner atana thlan mi 257 te Loan pe tawh

Mizoram sawrkar Flagship programme Bána Kaih (Handholding) Scheme Phase-I hnuaia Loan Component-ah Progress Partner atana thlan mi 744 zinga mi 257 hnenah Bank-te'n loan cheng nuai 2,103.84 an pe tawh a; Progress Partner atana thlan zinga Bank ten Loan an pek tawh hi zaa 34.54 an ni.

Akashvani News, Aizawl thudawn danin, Bána Kaih Scheme Phase-I hnuaia Loan Component-ah hian Bána Kaih kalpuinaa sawrkarin a thawhpui Bank pathum - Mizoram Rural Bank (MRB), Mizoram Cooperative Apex Bank (MCAB) leh State Bank of India (SBI)-te chuan loan la tura thlan Progress Partner mi 744 zinga mi 257 hnenah loan an pe tawh a; loan an pek tawh zinga 87 hi Horticulture Department hnuaia mite niin an tam ber a, AH&Vety Department hnuaia loan hmu mi 56-in an dawt a ni.

Bána Kaih Phase-I hnuaiah hian MRB-in mi 180 hnenah loan an pe tawh a; SBI-in mi 50 hnenah leh Apex Bank-in mi 27 hnenah an pe tawh a, Bank pathumin mi 257 hnena loan an pek tawh belhkhawm hi a vaiin Rs 21,03,84,750 a ni tawh a ni.

Bana Kaih Scheme Phase-I hnuaia Loan hmu tawh mi 257-te hi Impelementing Department 13 hnuaia mi an ni a; Horticulture Department hnuaiah mi 87 niin an ram ber a, AH&Vety Department hnuaiah mi 56 awmin an dawt a, Commerce & Industries Department hnuaiah mi 30 niin Tourism department hnuaiah mi 17 an awm bawk. Heng bakah hian Land Resources, Soil & Water Conservation Department hnuaiah mi 16 awmin, UD&PA Department hnuaiah mi 15 an awm a, Agriculture Department hnuaiah mi 11 awmin, Science & Technology hnuaiah mi 7 an awm a, Fisheries Department hnuaiah mi 6 awmin, Sericulture Department hnuaiah mi 5 an awm a, I&PR Department hnuaiah mi 3 leh LESDE Department leh Spors & Youth Services Department hnuaiah mi 2 ve ve an awm a ni.