Mizoram-ah HIV kai 33,641 hmuh an ni tawh

Kum 1990 atanga kumin October thla thleng khan Mizoram-ah HIV kai mi 33,641 hmuhchhuah an ni tawh.

    Nimin-a Aizawl Vanapa Hall-a World AIDS Day 2025 hmannaah MSACS Project Director Dr. Jane R. Ralte chuan Mizoram-ah a hmasa ber atan October 1990 khan HIV positive hmuhchhuah a nih thu leh kum 1990 atanga thla liamta, October 2025 thleng khan Mizoram-ah HIV kai mi 33,641 hmuhchhuah an nih tawh thu a sawi a, Mizoram-a HIV kai zinga zaa 70.3 chu mipat hmeichhiatna hman khawloh atanga kai an nih thu sawiin, inchiuna hriau inhmantawm vanga kai zaa 27.3, nu-in a faa a kài zaa 1.8 leh kaina chhan hriat loh zaa 0.74 an awm thu a sawi bawk. Dr. Jane Ralte chuan mipat hmeichhiatna atanga HIV kai zinga zaa 55.3 chu kawppuite atanga kai an nih thu sawiin, hriatchian lohte nena mipat hmeichhiatna hman atanga kai zaa 34.3 an awm thu a sawi a, Sex atanga HIV kai zingah hian mipa mahni anpui kawp atanga inkaichhawng zaa 7.7 an awm a; mahni inzuarte atanga kai zaa 2.5 an awm thu a sawi bawk a. Sex atanga HIV kai hmuhchhuah zingah kumtin mipa mahni anpui kawp atanga kai an pung chho zel niin a sawi bawk.