ICTC atangin HIV kai 28,904 hmuh an ni tawh

Mizoram-ah a thlawna HIV vei leh vei loh enna hmun, Integrated Counselling and Testing Centre (ICTC) chu hmun 39-ah awmin heng ICTC 39 atang hian April 2009 atanga kumin March thla thleng, kum 16 chhungin HIV kai mi 28,904 hmuhchhuah an ni a, an zinga 2,161 te chu raipuar an ni.

Mizoram State AIDS Control Society (MSACS) hnuaia ICTC 39-ah hian kum 16 chhung khan raipuar 3,41,875 te thisen endik a ni a, heng zingah hian mi 2,161 te chuan HIV an kai tih hmuhchhuah a ni a. Kum 16 chhung hian ICTC atangin kumtin HIV kai raipuar mi 100 chuang hmuhchhuah ziah an ni a, kum 2021-22 khan HIV kai raipuar 177 hmuhchhuah niin an tam ber kum a ni a, an tlem ber kum chu kum 2018-19 niin mi 106 hmuhchhuah an ni bawk.

Mizoram-a ICTC-ah hian raipuar chhiar tel loin kum 16 chhung khan mi nawlpui zinga mi 7,36,934 te chu an thisen endik a ni bawk a; thisen endik zingah hian HIV kai mi 26,743 hmuhchhuah niin mi nawlpui thisen endik zawng zawng atanga chhutin HIV kai hmuhchhuah hi za zela 3.63 a tling bawk a ni. Kum 16 chhunga mi nawlpuia thisen endikna atang hian chawhrualin kumtin HIV kai thar mi 1,671 awm ang an ni a; mi nawlpui thisen endik atanga HIV vei hmuhchhuah tam ber kum chu kum 2018-19 niin hemi kum hian mi 2,557 hmuhchhuah an ni bawk.

MSACS hnuaiah hian HIV kaite enkawlna leh damdawi an lakna hmun, ART Centre 14 a awm a; District tinah a thlawna thisen endikna ICTC leh HIV kaite enkawlna ART Centre hi a awm a ni.