Loan pechhuak tlem leh lutuk Bank te chu enliam mai chi ah an ngai lo tih CM in a sawi

Chief Minister Lalduhoma chuan Bank te chu an sum dawn (deposit) tlingkhawm atanga teha zaa sawmruk (60%) tal mipuite hnena puktir (Advance) tura beisei an nih thu sawiin, Loan pechhuak tlem leh lutuk, National Benchmark phak lo leh lutukte chu en liam mai chi niin an ngai lo tih a sawi.

Mizoram-a sawrkar hriatpui Bank awm zawng zawngte intawhkhawmna leh an hnathawh thlirletna, State Level Bankers Committee (SLBC) thutkhawm chu nimin khan Aijal Club-ah neih niin he hunah hian Chief Minister Lalduhoma chuan tun tum hi Chief Minister a nih hnua SLBC a telpui tum hnihna a nih thu sawiin, Meeting hmasa atanga tehin hmasawnna duhawm tak tak hmuh tur a awm thu leh lawmawm a tih thu a sawi a. A bik takin CD Ratio nei tha Bank pathum- MRB, SBI leh Apex Bank te chungah lawmthu sawiin, “Bank thenkhat, loan pechhuak tlem leh lutuk, National Benchmark phak lo leh lutukte erawh hi chu en liam mai chi niin kan ngai lo,” a ti a. CD Ratio nei hniam ber, 5.30% chauh tlin phak Bank pakhat chu an insawifiahna (explanation) a hnena thehlut rang turin a hriattir a. Bank te hi an sum dawn (deposit) tlingkhawm atanga teha zaa sawmruk (60%) tal mipuite hnena puktir (Advance) tura beisei an ni a. Hei hi an hnathawh tehna langsar taka hman a ni thin a. Tun SLBC report-a a lan danin YES Bank, Bandhan Bank, SSFB, AXIS, HDFC, ICICI leh CBI te CD ratio chu 31% aia hniam vek an ni.

Sawrkar chuan mitin banphak-ah Bank te hi inzarpharh se a duh thu Chief Minister chuan sawiin, “Tuna Branch kan neih mek 278 zinga 183 te hi Aizawl, Lunglei leh Kolasib-ah an awm a. A dang 95 te hi District dang pariat-ah an inzarpharh a. SLBC leh RBI hnenah Bank-te inzarpharh dan hi lo ennawn a, thingtlang mipuite banphaka intizau turin ka ngen a ni,” a ti a. Mizorama Bank Branch tam takah thawktu an tlem thin avangin mipui tan an tangkai tur angin an tangkai zo lo thin nia sawiin, Hnathawktu indaih tawk tak dah tum theuh turin Bank thuneitute hi a ngen bawk.

Mizoram sawrkar flagship programme Handholding Partner Bank atan Bank pathumte chu inremna an ziahpui thu pawh Chief Minister chuan sawiin, “Anni hian tha taka min thawhpui chuan kan mamawh an phuhru zo turah kan ngai a. Nimahsela, Mizoram State Policy Coordination Committee hnuhnung ber report-ah khan kan Partner Bank-te Handholding Loan hi zaa sawmli pahnih (42%) te hnenah chauh Vawiin thlengin an la pe chhuak a. Sawrkarin chak taka kalpui kan duh bawk si a. Partner Bank neih belh mai hi thain kan hria a ni,” a ti bawk.

He thutkhawm ah hian Chief Secretary Khilli Ram Meena leh Finance Commissioner  Vanlaldina Fanai bakah sawrkar mi pawimawh dangte telin September thla tawp thlenga Bank hrang hrangte hnathawh dan thlirlet a ni.