Chief Minister leh hmeichhe zirlai naupangte inkawmna hun Aizawl-ah buatsaih a ni

Chief Minister Lalduhoma leh hmeichhe zirlai naupangte inkawmna hun ‘Meet Your CM With Adolescent Girls: A Celebratory Plantation of Trees under BBBP’ chu nimin khan neih a ni.

Mission Shakti hnuaia State Hub for Empowerment of Women (SHEW), Women & Child Development Department te buatsaiha Aizawl Sumtual-a he hun buatsaih ah hian Chief Minister Lalduhoma chuan thu tawi sawi hmasa in, “Tuna kan sawrkar hi Mizoram chanchina Cabinet Minister atana hmeichhia nei hmasa ber kan ni a. Kan MLA Pi Baryl Vanneihsangi chuan kan ram rorelna sang ber Assembly Session min lo kaihruai tawh bawk a. A hmasa ber atan Gender Budget kan nei bawk,” a ti a. “Kan Officer te zingah hmeichhia an tam hle a, sawrkar Office tin hi han fang ila hnathawktu zingah hmeichhia an lo tam deuh zawk zel thin. Kan sumdawnna hmunte chu kan hmeichhiate enkawl deuh vek an ni. Voters-ah hmeichhiate in tam zawk a, mipate aiin in thi tlem zawk zel thin. Kan hmanzia leh tihphungah hmeichhiate thliarna a tam lem lova, hnamdang te nena khaikhin chuan a ziaawm pawl tak kan ni awm e,” tiin hmeichhia te dinhmun tlangpui a tarlang a. “Kan sawrkar hian kan hmeichhiate venhimna leh chawikanna kawnga theihtawp kan chhuah reng a. Tunah pawh hian Working Women Hostel thar tur hi hmun pasarih (7)-ah kan sa mek a ni,” tiin SASCI atangin Falkawn, ITI, Thenzawl, Champhai, Lunglei Ramthar Veng, Khatla leh Ramhlun Sports Complex-ah te Working Women Hostel hi sak mek a nih thu a sawi a. Heng bakah hian kan neih sa pariat - Aizawl-ah pali leh Lunglei, Saitual, Mamit leh Siaha-ah te an awm mek bawk.

He hunah hian SW,WCD Minister Lalrinpuii pawhin WCD Scheme pakhat Mission Shakti hnuaia BBBP (Beti Bachao Beti Padhao) hnuaiah he programme, Chief Minister leh hmeichhe tleirawlte inbiakpawh theihna hun leh thingphunna hun hman a ni chu lawmawm a tih thu a sawi a. Hmeichhiate humhimna leh chhawmdawlna Scheme hrang hrang awm te sawiin, a hrechiang duh tan engtik lai pawhin 181 (toll-free)-ah biak theih reng a nih thu a sawi bawk.

Hemi hnu hian Chief Minister leh naupangte inkawmna hun hman zui niin Chief Minister hian an zawhna hrang hrangte a chhansak bakah fuihna thu a sawi a. He inkawmnaah hian St. Paul’s Higher Secondary School, Govt. JL High School, Govt. Chawnpui High School, Neuhof English Medium School leh Mount Carmel School atangte in zirlai hmeichhe tleirawl thlanchhuah te an tel a. Chief Minister hian Aizawl Sumtual-ah hian Thing a phun nghal bawk a ni.