LADC-ah Inthlan Campaign hun a tawp dawn

Tunkar Nilaini-a Lai Autonomous District Council (LADC) inthlanpui neih tur atana Campaign theih hun chu Vawiin tlai hian a tawp dawn ta a, he inthlanna neih tur atan hian inbuatsaihna pawh peihfel thawkhat a ni tawh.

MDC Seat 25 awmna LADC-a Inthlanpui vawi 12-na hi tunkar Nilaini khian neih tura ruahman a ni a, Lawngtlai DC leh District Election Officer Donny Lalruatsanga chuan hriattirna tichhuakin inthlanna muanawm, thianghlim leh felfai a awm theih nan Vawiin, December 1, 2025 tlai dar 4:00 atanga inthlan ni tlai dar 4:00 thleng chu ‘Silent Period’ atan a puang a, hemi hun chhung hian mimal emaw, pawl emaw, Political Party ang emaw a he inthlan kaihhnawih a Lai Autonomous District Council pawn lam atang Campaign kaihhnawih - vantlang punkhawm huaihawt leh neih emaw, aurinna hman emaw phal ani tawh dawn lova, LADC Area an chhuahsan vek tur anih thu a sawi a ni.

Naktip-a LADC Inthlanpui neih tur atan hian hmun hla zawka Duty turte chuan Vawiin hian an Duty-na tur hmun an pan tan dawn a, he inthlanna a Duty turte chuan kar kalta Nilaini atang khan Ballot Paper hmanga Vote thlakin Inrinni khan Vote thlak hi zawhfel a ni a, hriat theih chinah Vote 453 tlain District Election Officer, Donny Lalruatsanga chuan inthlanna buaipui tur Official ten Vote an thlak ah dik taka Vote thlak chu an ngai paiwmawh hle tih sawiin, Official zawkte thil diklo leh rinhlelh theiha an awm theihna remchang awm thei apiang chu a theih ang anga en uluk turin ruahmanna siam a nih thu a sawi bawk.